Baqytbek Smaǵul balabaqshalarǵa qarajat nege jetpeı jatqanyn aıtty
«Depýtattyq saýal mektepke deıingi tárbıe men oqytýdyń jan basyna shaqqandaǵy normatıvtik qarjylandyrý ádistemesine qatysty bolmaq. Bul máselede úlken problema bar ekenin óńirlerge barǵanda tanysyp bildim. 2017 jyly QR Bilim jáne ǵylym mınıstrliginiń buıryǵymen bilim berý mekemelerin jan basyna shaqqandaǵy normatıvtik qarjylandyrý ádistemesi bekitilgen, onyń ishinde mektepke deıingi tárbıe men oqytý uıymdary da qamtylǵan. Bul ádisteme 2020 jyly Qyzylorda qalasynda, al 2021 jyldan bastap oblys boıynsha qoldanyla bastady. Osy kezdegi tájirıbe ádistemede eskerilmegen birqatar jáıttardy kórsetti. Jobalyq qýaty tómen balabaqshalarǵa osy ádistememen eseptelgen qarjy jetkiliksiz. Nátıjesinde, balabaqshalarda eńbekaqy men kommýnaldyq qyzmetterge bereshekter qalyptasyp, qyzmetkerlerdiń zańdy renishin týdyrýda», - dedi B. Smaǵul Bilim jáne ǵylym mınıstrligine joldaǵan saýalynda.
Onyń aıtýynsha, bala-baqshalardaǵy shtat qurylymy QR Úkimetiniń 2008 jylǵy 30 qańtardaǵy 77 qaýlysyna sáıkes bolýy tıis. Alaıda, ádistememen eseptelgen qarjy jetkiliksiz bolǵandyqtan, naqty shtat sany kóptegen jaǵdaıda qajettilikke sáıkes emes.
«Mınıstrliktiń buıryǵymen bekitilgen ádisteme Qazaqstan Respýblıkasy Úkimetiniń qaýlysyn oryndamaýyna ákelýde. Qyzmetkerler tolyq shtattyń ornyna 0,5-0,75 shtat birligimen jumys istep, olardyń eńbek quqyqtary buzylýda. Buǵan qosa, bir Qazaly aýdany boıynsha búgingi tańda 17 bala-baqshaǵa jabylý qaýipi tónip tur. Sonymen qatar, dál osyndaı jaǵdaı Túrkistan oblysynda da oryn alyp otyr», - dedi depýtat.
«Qazaqstan Respýblıkasynyń Bıýdjet kodeksiniń 42 babynyń 7 tarmaǵyna sáıkes, mınıstrliktiń qabyldanǵan buıryǵy jergilikti bıýdjet shyǵystarynyń ulǵaıýyna ákelýine baılanysty jetispeıtin qarjy respýblıkalyq bıýdjet esebinen ótelýi tıis. Jáne de aldaǵy ýaqytta mundaı jaǵdaı oryn almaý úshin ádistemede jobalyq qýaty tómen bala-baqshalardyń normatıvine joǵarylatý koeffıtsıenti qoldanylýy kerek jáne jylýǵa qajetti qarjy ádistemeden tys bólek eseptelip qaralýy tıis», - dedi ol.