Baqytbek Esentaevqa qatysty appelıatsııalyq shaǵym qanaǵattandyrylmady
TALDYQORǴAN. QazAqparat - Búgin Almaty oblystyq sotynda Baqytbek Esentaevqa qatysty appelıatsııalyq shaǵym qaraldy, dep habarlaıdy «QazAqparat» HAA tilshisi. Alaıda, qos taraptyń shaǵymy qanaǵattandyrylmady.
Sot otyrysyna Baqytbek Esentaevtyń qorǵaýshysy Bekbolat Jekseıitov qatysty. Alaıda, ol jýrnalısterge pikir bildirýden bas tartty.
Esterińizge sala keteıik, 13 qarasha kúni Almaty oblysynyń qylmystyq ister jónindegi mamandandyrylǵan aýdanaralyq sotynda sýdıa Berikjan Baıjúnisov Baqytbek Esentaevqa qatysty sot úkimin jarııa etti. Sýdıa Baqytbek Esentaevqa qatań rejimdegi kolonııada 9 jylǵa bas bostandyǵynan aıyrý týraly úkim taǵaıyndaǵan bolatyn. Alaıda, qos tarap sot úkimimen kelispedi. Appelıatsııalyq shaǵym túsirdi. Qorǵaýshylardyń pikirinshe, Baqytbek Esentaev óziniń burynǵy áıelin óltirýge oqtalmaǵan.
Aıta ketý kerek, Baqytbek Esentaev adam óltirýge oqtalý baby boıynsha kináli dep tanylǵan bolatyn.
Ol óziniń shet elden elge oralǵan áıelin Qulja tas jolynyń boıynda uryp, birneshe jerine pyshaq jaraqatyn saldy.
