Baqyt Sultanov jumys saparymen Almaty oblysyna bardy

Oblys ákimi Qanat Bozymbaev birqatar problemalyq máselelerdi jáne olardy sheshýdiń yqtımal joldaryn atap ótti. Atap aıtqanda, ol isten shyǵyp qalǵan sýarmaly jerlerdi aınalymǵa tartý jáne osy sanattaǵy jerlerden aýyl sharýashylyǵy ónimderiniń salyq jınaýyn 35%-ǵa arttyrý jónindegi sharalar týraly habarlady.

Sonymen birge, oblys ákimi B. Sultanovqa tozǵan sý qubyry jelilerin rekonstrýktsııalaý, oblystyń eldi mekenderin gazdandyrýdy jalǵastyrý, taý-ken óndirý ónerkásibin, Taldyqorǵan qalasynyń ınjenerlik-kólik ınfraqurylymyn damytý, kezekte turǵandardy qoljetimdi jáne sapaly turǵyn úımen qamtamasyz etý, úsh aýysymdy oqytýdy joıý, kommýnaldyq menshikti basqarýdyń keıbir máseleleri, qoǵamdyq jumystar men muǵalimderdiń jalaqysyn uıymdastyrý, sondaı-aq saıajaı alaptarynyń problemalaryn sheshý barysy týraly baıandady.

Qanat Bozymbaevtyń aıtýynsha, joǵaryda atalǵan birqatar problemalardy sheshý úshin qosymsha bıýdjettik qarjylandyrý qajet. Ákim Premer-Mınıstrdiń orynbasarynan óńirdiń ótinimderin qoldaýdy surady. Premer-Mınıstrdiń orynbasary – saýda jáne ıntegratsııa mınıstri Baqyt Sultanov qazirgi ýaqytta Úkimettiń keńeıtilgen otyrysynda aıtylǵan el Prezıdentiniń tapsyrmalaryn tıimdi oryndaý maqsatynda bıýdjetti naqtylaý jobasyn daıyndaý jumystary júrgizilip jatqanyn atap ótti.

«Barlyq máselelerdi qarjy jáne ulttyq ekonomıka mınıstrlikteri taldaıtyn bolady. Keńeste aıtylǵan birde-bir másele nazardan tys qalmaıdy», – dedi B. Sultanov.

Ol sondaı-aq ákimdiktiń azyq-túlik qaýipsizdigin qamtamasyz etý, áleýmettik mańyzy bar taýarlardyń baǵasyn baqylaý jáne jalpy saýda salasyn damytý maqsatynda naryqtar men bazarlardy jańǵyrtý jónindegi jumysynyń basymdyǵyna nazar aýdardy.

QR Premer-Mınıstriniń orynbasary – saýda jáne ıntegratsııa mınıstri Baqyt Sultanovtyń Almaty oblysyna jumys sapary Qazaqstan-Qytaı shekarasyndaǵy «Nur joly» ótkizý pýnktine, «Qorǵas – Shyǵys qaqpasy» erkin ekonomıkalyq aımaǵyna, «Qorǵas» HShYO-ǵa barýymen jalǵasty. «Nur joly» ótkizý pýnktinde B. Sultanov jaýapty mamandarmen, sondaı-aq júk tasymaldaý protsesine qatysýshylarmen taýarlardy tasymaldaýdyń qoldanystaǵy tártibiniń tetikterin jáne júkterdi tasymaldaý protsesin jetildirý júıesin talqylady.

Bul rette, basty nazar júk tasymaldaýdyń biryńǵaı elektrondyq kezegin uıymdastyrý ádisterin talqylaýǵa jáne júk tasymaldaýdyń jeke operatorlaryn (qazirgi ýaqytta olardyń ekeýi) alyp tastaý esebinen tasymaldaý qunyn edáýir qysqartýǵa aýdaryldy. Júk tasymaldaýshylarǵa qol jetkizý tásilin ózgertý mindeti qoıyldy.

Jergilikti tasymaldaýshylardyń áleýmettik máselelerin sheshý jáne jumyspen qamtýdy qamtamasyz etý úshin on kún ishinde bastamashyl tobymen birge júksiz kólikterdi alyp tastaı otyryp kezekti «tazalaý» tapsyryldy. Sonymen birge ártúrli júk túrlerin tasymaldaýshylardyń ońtaıly modelin ázirleý tapsyryldy.

«Qorǵas – Shyǵys qaqpasy» AEA keńsesinde ótken keńeste ortalyq memlekettik organdar men óńir ákimdiginiń ókilderimen Qorǵas torabyn – «Qorǵas» halyqaralyq shekara mańy yntymaqtastyǵy ortalyǵyn jańǵyrtýdy qosa alǵanda, transshekaralyq habtardy damytý tujyrymdamasyn talqylady.

Qazirgi ýaqytta «Qorǵas» HShYO aýmaǵynda qazaqstandyq jáne sheteldik kapıtaldyń qatysýymen birqatar ınvestıtsııalyq jobalardy iske asyrý pysyqtalýda: sút, shulyq-uıyq ónimderdiń, bólmearalyq esikterdiń óndirisin ashý, jumsaq jáne korpýstyq jıhazdardy qurastyrý jáne basqalary.

Baqyt Sultanov transshekaralyq ónerkásiptik kooperatsııa orny retinde habtardy qalyptastyrý men damytýdyń biryńǵaı júıesin ázirleý qajettigine basa nazar aýdardy.

«Bizge tek dıýtı-frı qajet emes. Óndiristerdi, sonyń ishinde eksportqa baǵdarlanǵan óndiristerdi qurý jóninde jumys isteý qajet. Sondyqtan habtardyń negizgi aýmaqtary ındýstrııalyq-logıstıkalyq aımaqqa aınalýy tıis. Árıne, saýda jáne týrıstik aımaqtardy tolyǵymen joqqa shyǵarýǵa bolmaıdy. Biraq olar óndiristen basym bolmaýy kerek», – dedi B. Sultanov.