Baqyt Sultanov turaqtandyrý qorlary jumysynyń kemshiligin atady

NUR-SULTAN. QazAqparat – Elimizde Azyq-túlik taýarlary turaqtandyrý qorlarynyń kólemi tıimdi qalyptastyrylmaı otyr. Bul týraly Úkimet otyrysynda QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Azyq-túlik taýarlary turaqtandyrý qorlarynyń kólemi jetkilikti emes. ıAǵnı 3,7 mlrd teńgege 25,4 myń tonna qalyptasqan. Olardyń ınterventsııasy jalpy tutynýdyń 0,2 paıyzynan 1,4 paıyzyna deıin quraıdy. Bul is júzinde baǵaǵa tıisti áser etpeıdi», - dedi agroónerkásiptik keshendi damytýdyń negizgi baǵyttary jáne ınvestıtsııalyq jobalardyń iske asyrylýy týraly baıandaǵan Baqyt Sultanov.

Onyń atap ótýinshe, turaqtandyrý qorlarynyń ózderi de tıimdi qalyptaspaıdy. Mysaly, Aqtóbe oblysynda 2020 jyly qanttyń, qaraqumyq jarmasynyń, kúnbaǵys maıynyń jáne jumyrtqanyń baǵalary edáýir ósken.

«Bul rette, jyl ishinde qorǵa baǵanyń shamaly ósýi baıqalǵan kókónister satyp alyndy. Turaqtandyrý qorlaryn tek táýekeli joǵary ımportqa baılanysty taýarlarǵa ǵana qarajat pen kúsh-jigerdi shoǵyrlandyrý arqyly qaıta qaraý qajet», - dedi mınıstr.