Baqyt Sultanov Saýda jáne ıntegratsııa mınıstrliginiń 2021 jylǵy josparyn jarııalady
«Biz mınıstrliktiń 2021 jylǵa arnalǵan jumys josparyn qurdyq, orta merzimdi perspektıvasyn aıqyndadyq. Men úsh mańyzdy máseleni atap ótkim keledi. Birinshisi - syrtqy saýda qyzmetindegi basymdyqtar. Olar basym eksporttaýshy eldermen, bizdiń seriktestermen saýda-ekonomıkalyq yntymaqtastyqty nyǵaıtýǵa baǵyttalady», - dedi Baqyt Sultanov Saýda jáne ıntegratsııa mınıstrliginiń alqa otyrysynda.
Mınıstr syrtqy saýda qyzmetindegi basymdyqtar retinde qarastyrylyp otyrǵan memleketterdi atady.
«Bul EAEO, QHR, Ortalyq Azııa elderi men Eýropalyq Odaq. EAEO-ǵa Qazaqstan tóraǵalyq etken kezde negizgi jumys odaq týraly kelisimdi, EAEO 2025 jylǵa deıingi damý strategııasyn júzege asyrýǵa baǵyttalady. Buryn aıtylǵandaı, ulttyq múddelerdi qorǵaý boıynsha kóptegen jumys júrgizildi. Bul qujat biz úshin mańyzdy jáne qajetti formatta qabyldandy. Saýda-ekonomıkalyq yntymaqtastyqty nyǵaıtý jáne kedergilerdi joıý boıynsha jumys áli de júrgiziledi. Sondaı-aq, DSU-nyń jańa talaptaryn engizýdi eskere otyryp, otandyq bıznesti qoldaýdyń jańa sharalaryn ázirleý kózdelip otyr», - dedi mınıstr.
Baqyt Sultanov odan bólek otandyq kásiporyndardyń básekege qabilettiligine, syrtqy naryqtarǵa shyǵýǵa, otandyq kásipkerlerdiń el ishinde de, syrtynda da múddelerin qorǵaýǵa basa mán beriletinin málimdedi.
