Baqyt Sultanov: Órtten qaza tapqan 5 balanyń ata-anasyna barlyq kómek kórsetiledi
ASTANA. QazAqparat - Órtten qaza tapqan 5 balanyń ata-anasyna barlyq kómek kórsetiledi. Bul týraly búgin Úkimettiń selektorlyq rejimdegi otyrysynda Astana qalasynyń ákimi Baqyt Sultanov aıtty,dep habarlaıdy QazAqparat tilshisi.
«Búgingi kúni Astana qalasy ákimdigi tarapynan barlyq tıisti kómek berilýde. Atap aıtqanda, jerleý rásimi, as berý uıymdastyrylyp, materıaldyq jáne psıhologııalyq turǵyda kómek kórsetilýde. Tıisti komıssııa quryldy. Qazirgi kúni ata-analarymen de jumys jasap jatyrmyz. Ary qaraı qandaı járdem kórsetiletindigi kelesi sharalarda qabyldanatyn bolady. Jan-jaqty kómek kórsetiledi», - dep atap ótti qala basshysy.
Sonymen qatar ol bul máseleniń qaıtalanýyna jol bermeý úshin tıisti jumystar da júıeli jasalyp jatqanyn aıtty.
«Aýa raıynyń kúrt sýytýyna oraı jer úılerde peshti jylytýǵa barynsha qosýǵa baılanysty órt shyǵý múmkinshiligi artýda. Sondyqtan bul jaǵdaılardyń aldyn alý úshin aýdan ákimderine, tótenshe jaǵdaılar departamentiniń, polıtsııa departamentiniń basshylaryna birlesip, túngi reıd júrgizý jumystary tapsyryldy. Al kúndizgi barlyq ot jaǵyp otyrǵan jer úıler men nysandardaǵy turǵyndarǵa órt qaýipsizdigi erejelerin saqtaý túsindirilip, tekserý júrgizý jumystary jalǵasatyn bolady», - dedi Baqyt Sultanov.
Eske sala keteıik, 4 aqpan kúni túnde elordanyń Saryarqa aýdanyndaǵy «Kóktal-1» turǵyn úı alabynda jeke úıdiń aýlasynda turǵyzylǵan ýaqytsha baspanada órt shyqty. Órtti sóndirý barysynda 2006, 2008, 2014, 2016, 2018 jylǵy 5 qyz balanyń denesi tabyldy.
Olardyń kishisi nebári 11 aılyq sábı edi. Órt kezinde bes balanyń ata-anasy túngi jumysta bolǵan.
