Baqyt Sultanov óndirýshilerge: Saýda kerýenimiz eń aldymen qazaqstandyq dúkenderge baǵyttalýy tıis
«COVID-19 pandemııasyna qarsy turý – bul bizdiń ortaq isimiz. Turaqtylyqqa degen senimniń quny asa joǵary. Óıtkeni osyndaı kezeńderde biz memleket naryqty azyq-túlikpen tolyqtyrý jónindegi óz mindettemeleri men málimdemelerin kepildi túrde oryndaı alady degen senimge muqtajbyz. Bizdiń qazir jumys isteıtin dárigerler men kez kelgen azamattyń dúkenge kirip, úıine qolaıly baǵamen kez kelgen azyq-túlikti satyp alý múmkindiginiń bolýy tıis. Úkimettiń basty mindeti - óz naryǵyn azyq-túlikpen molyqtyrý. Qazir halyqty barlyq qajetti taýarlarmen jabdyqtaýda irkiliske jol bermeý asa mańyzdy. Bizdiń dúkenderde árqashan birinshi kezektegi mańyzdy taýarlar – nan, sút, jarma, et jáne kúndelikti qajetti basqa da taýarlar bolý kerek. Mine, bular qazaqstandyqtar dastarhanynyń negizin quraıdy», - dep jazdy Baqyt Sultanov Facebook paraqshasynda.
Mınıstrdiń atap ótýinshe, 22 naýryzda Qazaqstan Respýblıkasynda tótenshe jaǵdaı kezinde áleýmettik mańyzy bar taýarlardyń birneshe túrin, ıaǵnı, qaraqumyq, bıdaı uny nemese bıdaı-qara bıdaı uny, qant, kartop, sábiz, repa, qyzylsha, pııaz, qyryqqabat, kúnbaǵys tuqymy men kúnbaǵys maıyn el aýmaǵynan áketýge tyıym salyndy.
«Biz úshin búgingi kúni ishki naryqty úzdiksiz qamtamasyz etý asa mańyzdy. Memleket basshysy atap ótkendeı, kez-kelgen talpynystyń jolyn kesýge qatań tıym salynatyn bolady. Qajet bolǵan jaǵdaıda memleket keıbir áleýmettik mańyzy bar taýarlarǵa baǵany memlekettik retteýdiń obektıvti qajetti tizbesin aıqyndaıdy. Sonymen birge, azyq-túlik óndirisiniń qunyn arzandatý boıynsha da sharalar qabyldanady: Prezıdent aýyl sharýashylyǵy ónimderi men azyq-túlik ónimderine QQS-ty ýaqytsha tómendetý, asa mańyzdy ımport boıynsha kedendik bajdardy joıý jóninde tapsyrma berdi. Biz qazaqstandyq óndirýshilerge osy kezeńdegi úzdiksiz jumystary úshin rıza bolýymyz kerek. Men taǵy da ózderińizden ótine suraımyn. El basshylyǵy elimizdiń barlyq qalalary men eldi mekenderinde tirshilikti qamtamasyz etý úshin asa mańyzdy taýarlarǵa qatysty irkilis bolmaýy úshin barlyq jaǵdaıdy jasaıdy. Biraq jalǵyz ǵana ákimshilik resýrspen buǵan qol jetkize almaımyz. Osyǵan baılanysty, qurmetti óndirýshiler, Sizderden azamattyq yntymaqtastyqty saqtap, ishki suranysty negizgi áleýmettik mańyzdy azyq-túlik taýarlarymen qamtamasyz etýge kómektesýdi suraımyn. Bizdiń saýda kerýenimiz eń aldymen qazaqstandyq dúkenderge baǵyttalýy tıis», - dedi Baqyt Sultanov.
Sonymen qatar, ol qazaqstandyq óndiris ónimderin eksportqa shyǵarý memlekettiń mańyzdy mindeti bolyp qala beretindigin, tipti osyndaı jaǵdaıda da memleket júk tasymaly úshin shekaralardyń ashyq bolýyn jáne eksporttyq jetkizilimderdiń saqtalýyn qamtamasyz etetindigin basa aıtty.
«Budan basqa, otandyq óńdelgen taýarlardy jyljytý úshin shyǵyndardy óteýge ótinimder jınalýda. Koronavırýs álemdik ekonomıkaǵa joıqyn soqqy jasady. Biraq ol óndirýshiler úshin «múmkindikter terezesin» ashady: eksporttyq naryqtarǵa áser etý salalaryn qaıta bóledi. Biz olardy oryndy paıdalana alamyz degen úmittemin. Men Qazaqstan taıaý ýaqytta barlyq qıyndyqtardy eńsere alatynyna senimdimin jáne qurmetti óndirýshiler, Sizderdi jáne bizdiń barlyq azamattarymyzdy osy qıyn ýaqyttan aman ótý úshin birlesip áreket jasaýǵa shaqyramyn«, - dedi ol.
