Baqyt Sultanov kópbalaly analarmen kezdesti
Ákim qabyldaýyna 70-ke jýyq ana keldi. Olarǵa kópbalaly analarǵa arnalǵan járdemaqy, ataýly áleýmettik kómek jáne baspanaly bolýǵa qatysty ákimdik tarapynan júrgizilip jatqan sharalar men qoldaýlar týraly aıtyldy.
Odan bólek, Baqyt Sultanov kópbalaly analardyń muń-muqtajyn tyńdap, qoıylǵan suraqtarǵa jaýap berip jatyr.
Eske sala ketsek, elorda ákimi buǵan deıin de astanalyq az qamtylǵan jáne kópbalaly analarmen kezdesken bolatyn.
«Az qamtylǵan jáne kópbalaly otbasylardy tolǵandyratyn basty máselelerdiń biri - turǵyn úı. Búginde bas qalada 45 myń adam turǵyn úı kezeginde tur, onyń 20 myńy az qamtylǵan, kópbalaly jáne múgedek múshesi bar otbasylar. Jáne 22 myńy memlekettik jáne bıýdjet qyzmetkerleri. Qazirgi ýaqytta osy tizimdegilerdiń 188-ine páter berildi, jalpy jospar boıynsha bıyl 781 páter berilýi tıis, biraq budan bólek jyl sońyna deıin áleýmettik jaǵynan osal topqa jatatyn otbasylarǵa qosymsha qarjylandyrý esebinen taǵy 1 800-1 900 páter beriledi», - degen bolatyn Baqyt Sultanov.
Odan bólek, ákimniń málimdeýinshe, kópbalaly jáne az qamtylǵan otbasylardan shyqqan 1-11 synyp oqýshylary osy jyldyń 1 qyrkúıeginen bastap mektepte tegin ystyq tamaqpen qamtylady.
