Baqyt Sultanov qazaqstandyqtardy shaıbaly hokkeıden álem chempıonatyna shaqyrdy
NUR-SULTAN. QazAqparat - Nur-Sultan qalasynyń ákimi Baqyt Sultanov qazaqstandyqtardy elordada shaıbaly hokkeıden ótetin álem chempıonatyna shaqyrdy, dep habarlaıdy QazAqparat tilshisi.
«Osy jyly Nur-Sultan qalasy alǵash ret birinshi dıvızıondaǵy erler komandalary arasynda shaıbaly hokkeıden álem chempıonatyn qabyldaıdy! Bul bizdiń abyroıymyzdy asqaqtatatyn, mereıimizdi ústem etetin úlken sporttyq shara bolmaq. 29 sáýir men 5 mamyr aralyǵynda, «Barys-Arena» muz saraıynda eń úzdik hokkeıshilerdi qabyldaımyz. Baıraqty jeńis úshin Sizderdiń qoldaýlaryńyz qajet! Kelińizder, sportshylarymyzdy qoldańyzdar!» - dep jazdy qala basshysy Feısbýktegi paraqshasynda.
Eske sala ketsek, shaıbaly hokkeı boıynsha 2019 jylǵy Álem chempıonatynyń matchtaryna arnalǵan bıletterdiń onlaın-satylymy ótken aıda bastalǵan bolatyn.
Shaıbaly hokkeı boıynsha Álem chempıonaty Astanada 2019 jyldyń 29 sáýiri men 5 mamyry aralyǵynda ótedi. Álemdik hokkeı dodasynda Belarýs, Majarstan, Slovenııa, Ońtústik Koreıa, Lıtva jáne Qazaqstan quramalary ózara baq synasady. Oıyndardyń qorytyndysy boıynsha eń kóp upaı jınaǵan qos qurama joǵarǵy dıvızıonǵa joldama alyp, Shveıtsarııada 2020 jyly ótetin Álem chempıonatyna attanady.
Bizdiń el tuńǵysh ret hokkeıden Álem chempıonatyn ótkizgeli otyr. Jarysty ótkizý quqyǵyn Qazaqstan ótken jyly Halyqaralyq hokkeı federatsııalary kongresinde (IIHF) alǵan bolatyn. Barlyq federatsııalar biraýyzdan Qazaqstannyń ótinimin maquldaǵan edi.
