Baqyt Sultanov Qazaqstan-Reseı shekarasynda kóliktiń jınalýyna baılanysty túsindirme berdi
«Qazaqstan-Reseı shekarasynda júk kólikteriniń jınalyp qalýyna baılanysty aqparatpen bólise ketsem. Mashtakovo/Syrym shekara beketinde Qazaqstanǵa kirý úshin kezegin kútken kólik sany az emes. Qazir jelide Reseı ótkizbeıdi, Qazaqstan kirgizbeıdi degen túrli habarlama tarap jatyr. Bul aqparattyń shyndyqqa janaspaıtynyn habarlaımyn.
Kólikterdiń turyp qalýyna sońǵy birneshe aptadaǵy aýa raıynyń qolaısyzdyǵy sebep. Bul aımaqta shamamen 10 kún boran boldy, kóktaıǵaqqa baılanysty joldar jabyldy. Aýa raıynyń qalypqa kelýimen júk kólikteriniń barlyǵy birden Reseıdiń Mashtakovo ótkizý beketine kelip, kóp shaqyrymdyq kezek qurdy. Oǵan qosa, 16-17 naýryzda bolǵan qarly boran kezinde Qazaqstannyń «Syrym» shekara beketinde elektr jaryǵy úzilgen. Qazaqstan tarapynan taýardyń keshigýine osy sebep boldy.
Biraq qazir joldar ashylyp, tazalandy, mashınalardy ótkizý qalypty rejımde júrip jatyr.
Sonymen qatar júkterdi shekaradan ótkizý protsesin jeńildetý maqsatynda qazir biz veterınarııalyq ınspektorlardyń shekara beketiniń aýmaǵyna kirýine ruqsat berý múmkindigin pysyqtap jatyrmyz. Bul júrgizýshilerdiń jeke veterınarlyq baqylaý beketine aınalyp ótý qajettiligin joıady jáne transshekaralyq saýda protsesin jedeldetedi.
Dostar, men shekara transshekaralyq saýdadaǵy jaǵdaıdy qadaǵalap otyramyn jáne reseılik áriptesterimizben únemi baılanystamyn. Qandaı da bir qıyndyqtar týyndaǵan jaǵdaıda, biz olardy joıý boıynsha jedel sharalar qabyldaımyz», dep atap ótti B. Sultanov.
