Baqyt Sultanov karantın joq aımaqtardaǵy saýda oryndarynyń jumysy týraly túsinik berdi
Sóz basynda Saýda jáne ıntegratsııa mınıstri Almaty men Nur-Sultan qalalarynda bul talap saqtalatynyn atap ótti.
«Nur-Sultan jáne Almaty qalalaryndaǵy saýda nysandary ákimdikterdiń jedel shtabtary sheshkendeı, karantınniń aǵymdaǵy rejıminde jumys isteıtin bolady» dep jazdy mınıstr.
Ol, sondaı-aq, karantınniń qoldanylǵan qatań sharalary (Nur-Sultan jáne Almaty qalalarynyń jabylýy, elge keletin barlyq adamdardy baqylaý) nátıje beretindigin eskergenin, sanıtarlyq baqylaýdyń kúsheıýi koronavırýstyń taralýynyń ósýin tejeýge múmkindik beretinin, aýrý tek shet elderden kelgen azamattarda jáne olarmen baılanysqan tulǵalarda ǵana rastalǵanyn atap ótti.
«Osyǵan baılanysty, sanıtarlyq-epıdemıologııalyq jáne medıtsınalyq qyzmetter barlyq yqtımal táýekelderdi jedel anyqtaıdy jáne buǵattaıdy, biz karantın joq aýmaqtarda iri saýda obektileriniń qyzmetin toqtatpaýǵa sheshim qabyldadyq. Bul saýda obektileriniń qyzmetkerlerine kelýshiler aǵynynyń kúrt azaıýy jaǵdaıynda shekteýli bolsa da, jumys isteýge jáne óz otbasylaryn qamtamasyz etýge múmkindik beredi», - deıdi Baqyt Sultanov.
Mınıstr Tótenshe jaǵdaı rejımin qamtamasyz etý jónindegi memlekettik komıssııanyń búgingi keńeıtilgen otyrysynda elimizdiń Prezıdenti Qasym-Jomart Toqaev memlekettik organdarǵa birqatar tapsyrmalar bergenin aıtty. Onyń negizgi leıtmotıvi – qatań oqshaýlaý sharalary men kásipkerler men halyqty aýqymdy qoldaý arasyndaǵy tepe-teńdik, onyń ishinde vırýstyń taralýyna qaýip tóndirmeıtin jerlerde jumys oryndaryn saqtaý.
«Bul rette, bazarlar, dúkender men dárihanalarda kúsheıtilgen sanıtarlyq jáne dezınfektsııalyq sharalar boıynsha engizilgen talaptardy taǵy da atap ótemin. Memleket basshysy, sondaı-aq, ákimdikterge kommýnaldyq tehnıkany, bazarlar men irgeles jatqan aýmaqtarǵa erekshe nazar aýdara otyryp, dezınfektsııalaýǵa qaıta beıindeýdi tapsyrdy. Barlyq personal betperde men qolǵaptarda jumys isteýi tıis. Árbir 3 saǵat saıyn arnaıy dezınfektsııalyq quraldarmen barlyq betterdi (edender, ústelder, oryndyqtar, lıftiler jáne t.b.) óńdeý qajet. Qoldy óńdeý úshin sanıtaızerlerdi ornatý tıis», - dedi ol.
Aıta keteıik, saýda jáne qyzmet kórsetý nysandarynyń jumys isteýine qoıylatyn talaptardyń tolyq tizimin Saýda jáne ıntegratsııa mınıstrliginiń nemese Densaýlyq saqtaý mınıstrliginiń saıtynan kórýge bolady.
