Baqyt Sultanov qandaı kásiporyndar taratylatynyn aıtty
ASTANA. QazAqparat - QR Qarjy mınıstri Baqyt Sultanov qandaı baǵynyshty kásiporyndar jabylatynyn aıtty, dep habarlaıdy QazAqparat.
«Búgin men Úkimet otyrysynda baǵynyshty kásiporyndardy ońtaılandyrý barysynda birneshe tetikter qoldanylatynyn aıttym. Onyń biri - ol jeke sektorǵa satý jáne senimgerlik basqarýǵa usyný jolymen shyǵarý. Sonymen qatar qaıta qurý men kásiporyndy jabý tásilderi de bar. Bul memlekettiń naryqtyq alańnan shyǵýyna jáne ony jeke bastamalar úshin tazartýǵa jaqsy ádis bolyp tabylady. Taldaý nátıjesi boıynsha 243 uıym taratylatyn bolady», - dedi mınıstr Úkimet otyrysynan keıingi baspasóz máslıhatynda.
Osy rette mınıstr «Jumys oryndary qysqara ma?» degen saýalǵa da jaýap berdi. «Taldaýǵa súıensek, bulardyń barlyǵy áreketsiz kásiporyndar ekeni anyqtaldy, ol oryndarda múldem ujymdary joq. Olardyń arasynda áleýmettik salada da óziniń qyzmetin júzege asyrǵan uıymdar bar. Bul rette búginde jumys istemeı turǵan otbasylyq dárigerlik ambýlatorııalar, aýdandardaǵy balalar men jasóspirimder klýbtary bar», - dedi ol.
Sultanovtyń aıtýynsha, olardyń arasynda arnaıy baǵdarlamalar men maqsattardy iske asyrý úshin qurylǵan kásiporyndar kezdesedi.
Budan bólek, jańa erejege sáıkes, eger de satylymǵa úsh ret qoıylǵanymen, satyp alynbasa, onda olar taratylýǵa jatqyzylady.
Osy oraıda Almatydaǵy emdeý-dıagnostıkalyq ortalyǵy, Semeıdegi «Eńlik-Kebek» kınoteatry, sondaı-aq birqatar kásiporyndar qamtylǵan.
«Atap aıtqanda, árdaıym áleýmettik aspektiler qarastyrylady jáne osy kásiporyndar qysqa merzimde jabylady»,-dep naqtylady mınıstr.
Budan buryn habarlanǵandaı, B. Sultanov búgingi tańda memlekettik menshikte 7 myńǵa jýyq uıym jumys isteıtinin, olar - memlekettik kásiporyndar, aktsıonerlik qoǵamdar, jaýapkershiligi shekteýli seriktestikter ekenin jetkizdi.
«Túgendeý jónindegi tapsyrmanyń aıasynda ákimderdiń orynbasarlaryn shaqyra otyryp jáne «Atameken» Ulttyq kásipkerler palatasynyń qatysýymen 16 oblys jáne 177 aýdan tyńdaldy. 6 751 uıymnyń ishinen ár nysan qaraldy. Sondaı-aq 376 respýblıkalyq menshik uıymy boıynsha 22 mınıstrlik pen vedomstvo baıandady», - dedi ol. Mınıstrdiń atap ótýinshe, túgendeý nátıjeleri boıynsha memlekettik menshikti ońtaılandyrý 2 kezeńmen júrgiziledi. Aldymenen memlekettik menshik uıymdarynyń sany 1 myńnan asa uıymǵa nemese 16 paıyzǵa qysqarady. Ekinshi kezeńde taǵy 4 600-ge jýyq uıymǵa nemese bastapqy sanynan 65 paıyzǵa azaıtý usynylady.
