Baqyt Sultanov qala tazalyǵy týraly: Qar ketip edi, búkil bylyq shyqty

NUR-SULTAN. QazAqparat - Elorda ákimi qala tazalyǵyn synǵa aldy, dep habarlaıdy QazAqparat tilshisi.

«Jerasty sýynyń deńgeıi kóterilip, jaýyn-shashynnyń kóbeıýine baılanysty turǵyndardyń kommýnaldyq qyzmetterge qatysty shaǵymdary kóbeıdi. Atap aıtqanda, tek qana 31 naýryz kúni turǵyndardan 909 shaǵym kelip tústi. Ótken aptanyń ishinde aýdan ákimderi 750 ótinish-shaǵym boıynsha jumys istedi. Degenmen, áleýmettik jelilerde sanıtarlyq tazalyqtyń joqtyǵyna qatysty aryz-shaǵym kóbeıip otyr», - dedi qala ákiminiń orynbasary Arman Turlybek ákimdik apparatynyń otyrysynda.

Ákim orynbasary Baqyt Sultanovtan atalǵan kemshilikterdi joıý maqsatynda aýdan ákimderine tıisti tapsyrma berýdi ótindi.

«Búgingi kúni qala boıynsha 1842 aýla alańynda 10 477 qoqys konteıneri ornatylǵan. Qazirgi ýaqytta qoqys shyǵarýǵa qatysty turǵyndardyń shaǵymy kóbeıip ketti. Buǵan qatysty áleýmettik jelilerde jazbalar men fotosýretter dáleli az emes. Buǵan sebep - qoqystyń ýaqytynda tazalanbaýy. Taǵy bir aıta keterligi - konteınerdiń ózi bos, biraq onyń jan-jaǵy qoqysqa tolyp jatady. Taǵy bir sebep - tazalyqqa jaýapty merdiger kompanııalardyń áli kúnge deıin tolyq anyqtalmaýy», - deıdi ol.

Óz kezeginde qala ákimi Baqyt Sultanov atalǵan problema jaýapty tulǵalar ýaqytynda jumys istemegendikten týyndaǵanyn aıtyp ótti.

«Kóktem kelip, qar erip edi, artynan bar bylyq shyqty. Qazir qala tolǵan qoqys pen balshyq, saz. Men arnaıy mobıldi top quryp, tekserýdi tapsyrdym. Ekrandaǵy sýretten qarańyzdarshy ne bolyp jatqanyn. Osynyń bári - ýaqytyly jumys istelmegendikten. Áıtpese qarajat bar, resýrs bar, qajetti mamandar da bar. Aýdan ákimderi, qaıda qarap otyrsyzdar?»,- dedi B.Sultanov.

Odan bólek, shahar basshysy qala kóshelerin sý basý máselesin de tilge tıek etti.

«Jyl basynan beri kóshelerdi sý basý boıynsha turǵyndardan 2844 shaǵym kelip tústi, onyń ishinde Baıqońyr aýdany - 623, Saryarqa aýdany - 861, Esil aýdany - 613, Almaty aýdanynan - 887 shaǵym. Biz halyqqa esep berý kezinde budan bylaı Astana Venetsııaǵa aınalmaıdy degenbiz. Endi ne boldy? Bul tazartýshy kompanııalardyń qardy ýaqytyly shyǵarmaýynan týyndap otyr. Osy jaǵdaı jyl saıyn qaıtalanady, buny júıeli túrde sheshýge bolmaı ma?», - dedi ákim.

Qala ákimi sóz sońynda jaýapty tulǵalarǵa máseleni júıeli túrde sheshý kerektigin aıta kele, aýdan ákimderine naqty tapsyrma berdi.