Baqyt Sultanov elordalyqtarmen birge aǵash otyrǵyzdy
Bul týraly qala basshysy Facebook paraqshasynda jazdy.
«Búgin Saryarqa aýdanyndaǵy aǵash otyrǵyzý teliminde turatyn turǵyndarmen kezdestim. Birge jeksenbilik ploggıngke qatysyp, aınalasyn tazaladyq. Qazir bul jerdegi 350 adam 60 jer úıde ómir súrýde. Biri qalmaı tazalyq naýqanyna shyǵyp, birlesip 2 tonna qoqys shyǵardyq. Kezdesý barysynda jergilikti turǵyndar tynys-tirshilikke baılanysty suraqtaryn qoıdy. Onyń ishinde aýyz sý, jol salý, jaryq pen balalar oınaıtyn alań ornatý máselelerin kóterdi. Árqaısysyna ákimdik shetki aýmaqtardy damytýǵa erekshe nazar aýdaryp júrgenin, eń kúrdeli máseleni sheshý úshin bıýdjetten qarjy qarastyrylǵanyn aıtyp, túsindirdim. Ózderi de qol qýsyryp otyrmaǵan eken. Shamalary jetkenshe kóshege jaryq ornatyp, aınalasyn tazalap otyrady. Belsendilikteri úshin úlken alǵysymdy aıttym», - deıdi shahar basshysy.
Baqyt Sultanov sondaı-aq, búgin «Kóktal 2» turǵyn alabynyń azamattarymen kezdeskenin jazdy.
«Olar da 68 mekteptiń aldyndaǵy saıabaqty kógaldandyrý úshin aǵash otyrǵyzý naýqanyna kirisipti. Birge qaıyń, qaraǵaı aǵashtaryn otyrǵyzdyq. Dál qazir bul aýdanda 12 myńnan asa turǵyn turady. Al saıabaq olardyń súıikti demalys ornyna aınalǵan», - deıdi ákim.
Qala basshysy «Kóktal» aýdanyn aralaý barysynda 68 mekteptiń janynan salynyp jatqan japsarlas nysannyń qurylysy men joldarynyń axýalyn tekserip, jaýaptylarǵa tıisti tapsyrma bergenin aıtty.
