Baqyt Sultanov EKSPO-2020 kórmesindegi qazaqstandyq pavılonǵa qatysty aıtty
«Bıyl «EKSPO-2020 Dýbaı» búkilálemdik kórmesi «Aqyldardy biriktire bolashaqty qurý» taqyrybyna arnalyp otyr. Qazaqstannyń pavılony AQSh, Shveıtsarııa, Italııa men Túrkııa elderiniń pavılondary turatyn «Múmkindikter» kesheninde ornalastyrylady. Osy kórme arqyly 2 mıllıon adam qazaqstandyq pavılonmen tanysady degen úmittemiz», - dedi Baqyt Sultanov búgin Saýda jáne ıntegratsııa mınıstrliginiń keńeıtilgen otyrysynda.
Dýbaıdaǵy búkilálemdik kórme 2020 jyldyń 20 qazanynda bastalyp, 2021 jyldyń 10 sáýirine deıin jalǵasady.
Sonymen birge mınıstr bıyl Qazaqstanda halyqaralyq deńgeıde Dúnıejúzilik saýda uıymynyń Mınıstrlik konferentsııasy ótetinin málim etti.
«Konferentsııa DSU-nyń joǵary jetekshilik organy sanalady. Ol otyrys eki jylda bir márte ótedi. Osy konferentsııaǵa DSU quramyndaǵy álemniń 160-qa tarta memleketinen delegattardy kútip otyrmyz. Sondaı-aq ol konferentsııaǵa 20 eldiń baqylaýshysy, halyqaralyq jáne úkimettik emes uıymdardyń músheleri keledi», - dedi Baqyt Sultanov.
