Baqyt Sultanov tsıfrlandyrý salasyndaǵy ákimshilendirý tıimdiligin jaqsartýǵa ýáde etti
«2017 jylǵy respýblıkalyq bıýdjettiń atqarylýynyń negizgi maqsattary - ekonomıkanyń jáne áleýmettik ál-aýqattyń ósýiniń oń qarqyndaryn saqtap qalý, daǵdarystan keıingi damý úshin jaǵdaı jasaý boldy. Nátıjesinde, ekonomıkanyń ósýi 4 paıyzdy qurady. JІÓ-niń osyndaı ósimine syrtqy faktorlardan basqa, ónerkásiptiń 7,1 paıyzǵa jáne qyzmet kórsetý salasynyń 2,7 paıyzǵa ósýi yqpal jasady. Bıýdjettiń kiristeri 9,7 trln teńgege jetti. Onyń 48 paıyzy transfertterge keledi. Bıýdjettiń kiristeriniń áli de bolsa Ulttyq Qordan tartylatyn transfertter men shıkizat sektorynan táýeldiligi, salyqtyq ákimshilendirýdegi biraz kemshilikter týraly sizderdiń aıtqan eskertýlerińiz oryndy. Ótken jyly qabyldanǵan Jańa Salyq kodeksi salyqtyq ákimshilendirýdi jetildirý jolymen bıznestiń turaqty damýyna, ınvestıtsııalardy yntalandyrýǵa jáne eldiń básekege qabilettiligin arttyrýǵa baǵyttalǵan», - dep toqtaldy mınıstr.
Onyń sózine qaraǵanda, aǵymdaǵy jyly osy ózgeristerdi iske asyrý arqyly kásipkerlerdiń qyzmetterine aralaspaý jáne bıznes protsesterdi tsıfrlandyrý esebinen salyqtardy jınaýdy ulǵaıtý josparlanýda. Olardyń kólemi ústimizdegi jyly Jalpy Іshki Ónimge shaqqanda 17%-ke jetkiziledi. Ári qaraı 2025 jylǵa deıin bul kórsetkishti 25%-ke deıin kóterý sharalar qabyldanatyn bolady.
Nátıjesinde, birjaǵynan salyqtardyń ishindegi shaǵyn jáne orta bıznesten túsetin kiristerdiń úlesi ulǵaıtylady, ekinshi jaǵynan bıýdjettiń munaı jáne basqa da shıkizat sektorlaryna táýeldiligi tómendeıdi.
«Esepti jyly bıznes júrgizý úshin jasalǵan qolaıly jaǵdaı shaǵyn jáne orta bıznes sanynyń 6,4 %, ıaǵnı 12 117 zańdy tulǵaǵa (2016 jyly - 188 377, 2017 jyly - 200 494) ósýine sebep boldy. Bıylǵy jyly mańyzy zor birqatar aqparattyq júıeler óz jumysyn bastady, keıbiri pılottyq rejimde iske qosyldy. Máselen, qosymsha qun salyǵy ákimshilendirýiniń protsesterin jetildirý maqsatynda «Elektrondyq shot-faktýralar» jáne ımporttalǵan taýarlardy qadaǵalaý júıeleri iske qosyldy. Bul júıeler operatsııalardyń aıqyndyǵyn jáne ártúrli shemalardyń jolyn kesýge yqpal jasaıdy», - dedi vedomstvo basshysy.
Taýarlardy ótkizýde 100% elektrondyq shot-faktýralar jazyp bergen salyqtóleýshilerge osy jyldyń 1-shi qańtarynan bastap QQS qaıtarý merzimi 30 jumys kúnine deıin qysqardy.
«Salyq tóleýshilerdiń shaǵymdaryn obektıvti túrde qaraý jáne olardy qorǵaý úshin ótken jyldyń ekinshi jarty jyldyǵynan bastap Qarjy mınıstrliginiń janynda Apellıatsııalyq komıssııa óz jumysyn bastady. Joǵaryda aıtylǵan salyq-keden salasyndaǵy bıznes-protsesterdi tsıfrlandyrý sharalary osy saladaǵy ákimshilendirýdiń tıimdiligin arttyrady dep sizderdi sendirgim keledi», - dedi Baqyt Sultanov.
