Baqyt Sultanov bes balanyń órtten kóz jumýynyń sebep-saldaryn anyqtaýdy talap etti
ASTANA. QazAqparat - Órt saldarynan zardap shekken otbasyǵa jan-jaqty kómek kórsetiledi, dep habarlaıdy elorda ákimdiginiń resmı saıty.
Baqyt Sultanov «Kóktal-1» turǵyn alabyndaǵy úıden shyqqan órt saldarynan bes balanyń qazasyna baılanysty shuǵyl keńes ótkizdi.
«Úlken qasiretke dýshar bolǵan otbasyǵa kóńil aıtyp, birge qaıǵyramyn. Qala basshylyǵy oqıǵa ornyna bardy, qaza bolǵan balalardyń ata-anasymen psıhologtar jáne áleýmettik qyzmet mamandary jumys istep jatyr», - dedi qala ákimi.
Óz kezeginde, TJD bastyǵynyń mindetin atqarýshy Marǵulan Amanbaevtyń túsindirýinshe, buǵan deıin Kóktal-1 turǵyn alabynda órt jáne basqa da tótenshe jaǵdaılardyń aldyn alýǵa baǵyttalǵan jumystar júrgizilgen.
«Bul úıge TJ departamentiniń qyzmetkerleri kelip, tıisti eskertýlerin jasady, olardy joıý boıynsha uıǵarym berilgen», - dedi Amanbaev.
Baqyt Sultanov aýdan ákimderiniń tótenshe jaǵdaılar departamenti jáne polıtsııamen birlesip tez arada turǵyn alabynyń árbir úıine kirip, órt qaýipsizdigi erejeleriniń saqtalýyn tekserýdi talap etti.
«Bul sizderdiń tikeleı mindetterińiz, ony únemi eske salýym kerek emes! Ol jumysty buryn júrgizý tıis edi, tótenshe jaǵdaılar departamentiniń qateligi bul. Osyndaı úılerdiń turǵyndaryn bilýlerińiz qajet», - dedi ol.
Qala ákimi quzyretti organdarǵa qaıǵyly oqıǵanyń barlyq mán-jaıyn anyqtaýdy tapsyrdy.
Eske sala keteıik, 4 aqpan túninde elordanyń Saryarqa aýdanyndaǵy Kóktal-1 turǵyn alabynda órt shyqty. Órtti sóndirý barysynda 2006, 2008, 2013, 2015, 2018 jyly dúnıege kelgen 5 balanyń denesi tabyldy. Eń kishisi nebári 11 aılyq sábı edi.
