Baqyt Sultanov Astanany damytýdyń jańa úlgisin jasaýdy tapsyrdy
ASTANA. QazAqparat - Búgin Astana qalasynyń ákimi Baqyt Sultanov apparat májilisinde shahardy damytýdyń jańa úlgisin qurýdy tapsyrdy. Bul týraly elorda ákimdiginen málim etti, dep habarlaıdy QazAqparat.
«Memleket basshysy bizdiń aldymyzǵa jaqyn arada oryndalýy tıis birqatar basym mindetterdi qoıyp otyr», - dep málimdedi Baqyt Sultanov.
Qalany damytýdyń jańa úlgisin engizý jáne ınnovatsııalardy ilgeriletý, kreatıvti adamdar sanyn kóbeıtý úshin qolaıly ortany qalyptastyrý - 2050 jylǵa deıingi damý strategııasyn ázirleýdi talap etedi. Jańa strategııany qurý jónindegi tapsyrmany Memleket basshysy osy jyldyń 11 qyrkúıeginde bergen bolatyn.
Ákim qaladaǵy qazirgi ahýalǵa keshendi túrde taldaý ótkizip, strategııalyq maqsatty anyqtaýdy, bolashaqtyń qandaı bolatynyn boljaýdy tapsyrdy. ıAǵnı ómir sapasyn arttyrý, qalalyq ortanyń úılesimdiligi, turaqty ekonomıkalyq ósim, resýrstardy tıimdi paıdalaný jáne t.b.
Elordanyń jańa strategııalyq damý úlgisi «Astana» halyqaralyq qarjy ortalyǵy bazasynda iskerlik qarjylyq habty damytýdy qamtıdy. Bul baǵyt sonymen qatar týrızm ındýstrııasy salasyn keńeıtý boıynsha jumysty kúsheıte túsýdi talap etedi.
«Osyǵan baılanysty iskerlik týrızm salasynda aldyńǵy qatarly halyqaralyq uıymdarmen áriptestikti nyǵaıtýdy tapsyramyn. Týrızm salasynda qyzmet kórsetý servısiniń sapasyn halyqaralyq standarttarǵa kóterý óte mańyzdy», - dedi B.Sultanov.
Ásirese qalalyqtardyń qolaıly ómir súrýi úshin jasalatyn ıgilikterge erekshe kóńil bólinýi tıistigi atap ótildi. Bul - abattandyrý, áleýmettik obektilerdi salý, turǵyn úı qurylysy jáne taǵy basqasy.
Budan bólek, elorda basshysy bıylǵa josparlanǵan jalpy alańy 2,3 mln sharshy metrden kem emes turǵyn úılerdi paıdalanýǵa berýdi tapsyrdy (jyl basynan beri 1699,6 myń sharshy metr turǵyn úı berildi).
«Ákimdiktiń jumysy Memleket basshysy atap ótken Bes áleýmettik bastamany júzege asyrýǵa baǵyttalýy kerek. Osy mindetterdi atqarý jańa jumys oryndaryn ashýǵa jáne qalanyń ary qaraı ekonomıkasyn damytýǵa áser etedi», - dep aıryqsha toqtaldy B. Sultanov.
