Baqyt Sultanov astanalyqtardyń basty problemasyn qalaı sheshetinin aıtty

ASTANA. QazAqparat - Astana qalasynyń ákimi Baqyt Sultanov kólik júıesin jańǵyrtý máseleleri qaralǵan máslıhattyń kezekti otyrysynda elordalyqtardyń basty túıitkilderin atady, dep habarlaıdy QazAqparat Elorda Info saıtyna silteme jasap.

Máslıhat otyrysynda ákim qala mańyndaǵy eldi mekenderdi damytýǵa ekpin beriletinin atap ótip, aldaǵy ýaqytta Ilınka men Lesozavodty aralap kóretinin jetkizdi. Onyń aıtýynsha, elordada kólik kollapsy asa ózekti bolyp tabylady. Biraq máseleni sheshý óte ońaı.

«Búgin, qala turǵyndary men qonaqtary úshin birinshi kezekte yńǵaısyzdyq týdyryp otyrǵany - kólik kollapsy. Ata-analar balalaryn balabaqshaǵa, mektepke kúndelikti jetkizip salǵanda muny kórip otyr. Keshe ádeıilep 17 mektep pen Respýblıkalyq fızıko-matematıkalyq mekteptiń janynan óttim. Shyntýaıtynda, kóptegen problemalardyń sheshimi ońaı. Tek kabınetterden shyǵyp, kósheni aralap, jaǵdaıdy qaǵazǵa túsirý kerek. Mektep basshylyǵymen, ata-analarmen kezdesip, kelisý qajet. Kóp jaǵdaıda problemany ózimiz jasap otyrmyz», - dedi B.Sultanov.

Ákim mektepter mańaıyn qarap shyqqannan keıin birbaǵytty joldar kólik qozǵalysyn durys uıymdastyrýǵa múmkindik beretinine kózi jetkenin aıtty. Onyń esepteýinshe, jarty saǵattyń ishinde 85 pen 180-inshi mektepter aınalasyna 70-80 kólik jınalǵan.  

«Árıne, School Bus-ty engizý, qoǵamdyq kólik sanyn ulǵaıtý jáne jol qozǵalysyn jeńildetý boıynsha júıeli sheshimderdi oılastyryp jatyrmyz. Tıisinshe, mashınalar sany azaıatyn bolady», - dep qosty ol.

Buǵan deıin habarlaǵanymyzdaı, máslıhat otyrysynda qala ákiminiń birinshi orynbasary Sergeı Horoshýn aldaǵy ýaqytta Astananyń sol jaǵalaýynda alty avtojol birbaǵytty bolatynyn aıtty. Búginde oń jaǵalaýda bir baǵyttaǵy alty jol bar.