Baqyt Sultanov áleýmettik nysandardy ýaqytynda berýdi tapsyrdy

Otyrysta 2019-2020 jyldarǵa arnalǵan jylytý maýsymyna daıyndyq týraly qala ákiminiń orynbasary Arman Turlybek málimdedi.

Onyń aıtýynsha, qalanyń energetıkalyq júıesine kúrdeli jóndeý jumystary bastaldy. Bıyl uzyndyǵy 3,9 shaqyrym bolatyn jylýmen qamtý jelilerin kúrdeli jóndeý jáne 28 570 shaqyrymdyq elektr jelilerin retke keltirý josparlanýda.

«2019-2020 jyldarǵa arnalǵan jylytý maýsymyna daıyndyq jáne ony ótkizýge qatysty qalalyq shtab quryldy. Aýdan ákimderi aýdandyq shtabtar quryp, qys mezgilinde turǵyndardan kelip túsken ótinishterdi turǵyn úılerge qyzmet kórsetetin PIK jáne basqa da máseleler boıynsha jylý berýge qatysty taldaý jasaý qajet», - dedi Arman Turlybek.

Sondaı-aq, aýdan ákimderi belgilenbegen oryndarda jınalǵan qoqystardy joıý boıynsha jumysty kúsheıtýi kerek. Búgingi tańda 165 qoqys úıindisiniń 80-i shyǵaryldy. Almaty aýdanynda - 16, Baıqońyr aýdanynda - 25, Esil aýdanynda - 15, Saryarqa aýdanynda - 24 qoqys orny joıyldy. Taǵy 85 qoqys úıindisi qalyp otyr.

Baqyt Sultanov aldaǵy jylytý maýsymyna muqııat daıyndyq júrgizý qajettigin atap ótti. «Qystyń qamyn jaz oıla» degen halyq danalyǵy bar. Ótken jylytý kezeńinde kóppáterli turǵyn úılerdi jylytý máseleleri boıynsha turǵyndardan 5 myńǵa jýyq ótinishi kelip tústi, onyń ishinde 2 265-i jylýdyń bolmaýyna qatysty. Biz qysqy daıyndyqqa erekshe nazar aýdarýymyz kerek», - dedi qala ákimi.

Turǵyn úı jáne áleýmettik nysandar qurylysy máseleleri boıynsha ákimniń orynbasary Nurlan Nurkenov baıandady. Qalada 228 kompanııa turǵyn úı salýmen aınalysady. «Bizdiń taldaýymyzsha, buzylý qaýpi bar problemalyq nysandar bar. Bul - 336 myń sharshy metr nemese elordanyń túrli aýdandaryndaǵy 24 TK. Biz olardy erekshe baqylaýǵa alamyz. Bıyl biz tapsyrýdy josparlap otyrǵan 4 áleýmettik nysan boıynsha da qaýip tónip tur. Bul - № 31 kóshesiniń ońtústigine qaraı, Nura-Esil arnasynyń shyǵysyna qaraı ornalasqan 1200 oryndyq mektep. Nysan daıyn, qasbet jumystary júrgizilýde. Qazir mektepke aparar jol da joq, sondaı-aq ınjenerlik jeliler de tartylmaǵan. Biz mektepti salǵanmen, oǵan aparatyn joldar men jelilerdi de qosa salý kerek», - dedi ol.

Baqyt Sultanov Kólik jáne jol-kólik ınfraqurylymyn damytý basqarmasynyń basshysy Ashat Qaraǵoıshınge qysqa merzimde ınfraqurylymdy jetkizý úshin barlyq qajetti sharalardy qabyldaýdy tapsyrdy. «Shilde-tamyz aılarynda muǵalimder jumys istep, jańa oqý jylyna daıyndalýy tıis. Nysan shilde aıynda ınjenerlik jelilermen birge tapsyrylýy tıis», - dep atap ótti Baqyt Sultanov.

Nurlan Nurkenovtyń aqparaty boıynsha, qazirgi tańda Nur-Sultan qalasynda 102 áleýmettik jáne mádenı nysan, onyń ishinde bıýdjet qarajaty esebinen 29 nysannyń qurylysy júrgizilýde. Bul - 19 mektep pen olarǵa japsarlas ǵımarattar, bir balabaqsha. Densaýlyq saqtaý salasyndaǵy tsıfrlandyrý týraly Qoǵamdyq densaýlyq saqtaý basqarmasynyń basshysy Marat Shoranov baıandama jasady. Onyń aıtýynsha, búgin 083, 086, 094, 095 medıtsınalyq anyqtamalar, aýrýhanalyq paraqtar men medıtsınalyq kitapshalar medıtsınalyq aqparattyq júıede tirkelip, barlyq qalalyq medıtsınalyq uıymdarda beriledi.

«Qazirgi ýaqytta atalǵan máseleni memlekettik tapsyrys alatyn jeke medıtsınalyq uıymdar arasynda júzege asyrý jumystary júrgizilýde. Sonymen qatar, qazirgi ýaqytta QR Densaýlyq saqtaý mınıstrligi qatań eseptilik blankilerinde mórsiz ýaqytsha eńbekke jaramsyzdyq paraǵyn berý úshin elordalyq densaýlyq saqtaý salasynda pılottyq jobany júrgizý múmkindigin qarastyrýda. Bul shara bıýdjet qarajatyn únemdeýge múmkindik beredi», - dedi ol.

Sondaı-aq, basqarma basshysy qalalyq medıtsına salasyndaǵy málimetterdi jınalyp, taldaý júrgiziletin biryńǵaı sıtýatsııalyq ortalyqtyń jumysy týraly aıtty. Osy rette Baqyt Sultanov ana ólimine qatysty máselelerge sapaly taldaý qajettigin atap ótti. «Júkti áıelderdi aldyn ala shaqyrý, olardy esepke qoıý, únemi qońyraý shalý qajet. Zamanaýı medıtsına salasyndaǵy jobalardy jalǵastyrý mańyzdy», - dedi qala ákimi.