«Baqyt qusy» qoıylymy elordalyq kórermenderdiń shynaıy qoshemetine bólendi

ASTANA. QazAqparat - Beıbitshilik jáne kelisim saraıyna jınalǵan elordalyq kórermender jazýshy, dramatýrg Dýlat Isabekovtiń «Baqyt qusy» atty lırıkalyq dramasyn tamashalap, erekshe sezimge bólendi.

Bul qoıylymǵa birneshe ult pen ulystardyń ókilderi beıbit te baqytty ǵumyr keship jatqan Qazaq eliniń búgingi kezeńi arqaý bolǵan. Kórmegen adam saıası drama shyǵar dep oılaýy múmkin. Alaıda, árbir shyǵarmasynda tereń mán, utymdy oılar men tapqyr ázilderdi keltire biletin sheber jazýshy Dýlat Isabekovtiń bul týyndysy da kórermenderdiń júregine jol tapty.

Drama ómirlik jary qaıtys bolyp, qos ulyna tárbıe berip otyrǵan Bátıma apaıdyń kóterińki kóńil kúıinen bastalady. Bul shańyraqtyń kórshileri orys, nemis jáne ózbek ultynyń ókilderi eken. Epızod barysynda kórshi orys jigitiniń Reseıge kóshkeli jatqany kórsetiledi. Osy jerde birneshe atasy týyp-ósken, shańyraqtyń ákesi Vasılıı Qazaqstannan basqa jaqqa kóshkisi kelmeıtinin málimdeıdi. Al nemis ultynyń ókili Karl Neıman bolsa, 1941 jyly nemisterdi Qazaqstanǵa kóshirgen kezde, qazaqtar jarty nandy bólip bergenin eske aldy.

«Baqyt qusy - adamdarǵa jaqsylyq syılaıtyn qasıetti qus. Ol keıde jeke adamnyń basyna, keıde tutas eldiń basyna qonady» degen qanatty sóz aıtylady. Qazaqstannyń búgingi jetistikteri, baqyt qusy qonǵan shaǵy sóz bolady.

Osy dramada qazaq jigiti Bektur káristiń qyzy Nellı Kımge ǵashyq bolady. Tereńine úńilsek, Kım otbasy ol qyzdy dúnıege kelgende asyrap alǵan eken. Sóıtip, ol káris otbasynda tárbıelengen, biraq qazaq mektebin bitirgen qazaqtyń qyzy bolyp shyǵady.

Qoıylymda Maıra Omar, Dáýren Serǵazın, Roman Chehonadskıı, Denıs Annıkov, Roman Tsoı, Antonına Pıak, Aıdana Syrbekovalar basty rólderdi sheber somdady.

Drama keıipkerleriniń tynys-tirshiligi qazaq ánderimen órilip otyrdy.

Dramanyń qoıýshy rejısseri Qazaqstan Respýblıkasynyń eńbek sińirgen qaıratkeri Nurqanat Jaqypbaı, qoıýshy sýretshi Qanat Maqsutov. Kompozıtory Qazaqstan Respýblıkasynyń eńbek sińirgen qaıratkeri Arystanbek Muhamedıuly.

Qoıylym sońynda sahnaǵa kóterilgen jazýshy, dramatýrg Dýlat Isabekov ártistermen birge elordalyq kórermenderge alǵysyn bildirdi.

Bul qoıylymdy Qazaqstan halqy Assambleıasynyń 20 jyldyǵy aıasynda Qazaqstan Respýblıkasy Mádenıet jáne sport mınıstrligi men Qazaqstan Ulttar teatry ujymy uıymdastyrǵan.

Eń bastysy, osy lırıkalyq drama kórermenderdiń ystyq yqylasyna bólendi.