Baqylaýshy organdardyń quqyqtyq saýatsyzdyǵy kásipkerlerdi tekserý kezinde zań buzýshylyqtar sanynyń artýyna áser etýde

Bul týraly búgin Astanada «Memlekettik baqylaýdyń zańdylyǵy men ashyqtyǵy - kásipkerler quqyqtaryn qorǵaýdyń kepili» taqyrybynda ótken dóńgelek ústelde QR Bas prokýratýrasy Quqyqtyq statıstıka jáne arnaıy esepke alý komıtetiniń tóraǵasy Murat Ahmetjanov málim etti, dep habarlaıdy QazAqparat.

M.Ahmetjanovtyń sózine qaraǵanda, jyl saıyn tekserýshi memlekettik organdar 250 myńǵa jýyq sharýashylyq sýbektisine tekserister júrgizedi. Al olardyń ishindegi basym deni - jekemenshik bıznes. Ótken jyly atalmysh Komıtet memleketik organdardyń tekseris júrgizý týraly 1154 aktisin tirkeýden bas tartyp, zańsyz tekserýlerdiń aldyn aldy.

«Sondaı-aq qadaǵalaý qyzmetti júzege asyrý barysynda memlekettik organdardyń 853 zańsyz tekserisi anyqtaldy. Aqtóbe oblysynda ústimizdegi jyldyń ózinde Komıtettiń aımaqtyq basqarmasy júrgizilgen 112 zańsyz tekseristi anyqtady, onyń ishindegi 32-sin sanıtarlyq-epıdemıologııalyq jáne tótenshe jaǵdaılar organdary júrgizgen», - dedi ol.

Komıtet tóraǵasynyń aıtýynsha, prokýrorlarmen qolǵa alynǵan sharalardyń nátıjesinde memlekettik organdardyń birneshe laýazymdy tulǵasy ákimshilik jaýapkershilikke tartyldy. Barlyǵy sońǵy eki jylda Komıtettiń aýmaqtaǵy organdaryn zań buzýshylyqtardy joıý boıynsha 300 usynym jasap, 252 laýazymdy tulǵany tártiptik jazaǵa tartqan.

«Taldaý nátıjeleri kórsetip otyrǵandaı, sanepıdqadaǵalaý, salyq organdary, ákimdikter men ishki ister organdary buzýshylyqtarǵa eń kóp jol beretin organdarǵa jatady. Baqylaýshy organdardyń quqyqtyq saýatsyzdyǵy tekseris kezindegi zań buzýshylyqtar sanynyń artýyna áser etýde. Mysalǵa, salyq organdarynyń 2009 jyldyń ekinshi toqsanynda jasaǵan tekseristeri 1,5 esege artsa, zańsyz tekseristerdiń sany 3 esege artqan. Osyndaı jaǵdaı sanepıd organdarynda da kórinis tabýda. Onda zańsyz tekseristerdiń sany 7- esege artty», - dedi M.Ahmetjanov.