Baqylaý ústinen baqylaý júıesin qurý durys emes - Úkimet basshysy
ASTANA. QazAqparat - Úkimettiń búgingi otyrysynda QR Ulttyq ekonomıka mınıstri Tımýr Súleımenov tutynýshylar quqyqtaryn qorǵaý salasynda "baqylaýshylar ústinen baqylaý júıesin" engizýdi usyndy.
Premer-Mınıstr ondaı bastamamen kelisken joq, dep habarlaıdy QazAqparat tilshisi.
Tımýr Súleımenovtiń sózine qaraǵanda, respýblıka boıynsha tutynýshylar quqyqtaryn qorǵaýmen aınalysatyn 174 qoǵamdyq uıym bar. Alaıda solardyń tek 65-si ǵana naqty jumys istep keledi. Negizgi sebep - qarjynyń tapshylyǵy. "Búginde osy salada biryńǵaı memlekettik baqylaý júıesi joq. Ulttyq ekonomıka mınıstrligi tek vedomstvoaralyq úılestirýmen ǵana aınalysady, arasynda zańnamany da túsindirip otyrady. Tutynýshylar quqyqtaryn qorǵaýǵa qatysty eshqandaı baqylaý fýnktsııalary joq. Al tekserispen aınalysatyn organdar óz mindetterin tolyǵymen oryndamaıdy", - deıdi mınıstr.
Osy oraıda T.Súleımenov qoǵamdyq uıymdardy memleket tarapynan qarjylandyrýdy usynyp otyr. Al quziretti memlekettik organǵa, ıaǵnı QR Ulttyq ekonomıka mınıstrligine tutynýshylar quqyqtaryn qorǵaý salasyndaǵy zańnamanyń oyrndalýyn baqylaý fýnktsııasyn berý kerek dep esepteıdi.
"Biz bıznestiń ózin baqylaıyq dep otyrǵan joqpyz. Ony "baqylaýshylar ústinen baqylaý" dep ataýǵa bolady. Bul degenimiz, basqa memlekettik organdardyń tutynýshylar quqyqtaryn qorǵaýǵa qatysty óz mindetterin qanshalyqty oryndap jatqanyn tekserý", - dep atap kórsetti T.Súleımenov.
QR Premer-Mınıstri Baqytjan Saǵyntaev "baqylaýshylar ústinen baqylaý júıesin" áli de pysyqtaý qajet dep sanaıdy. "Baqylaýshylardyń ústinen baqylaýshylardy qoısaq, sol baqylaýshylardyń ústinen taǵy baqylaýshylardy qoıamyz ba? Sóıtip, bir-birimizdiń artynan júreıik. Menińshe, bir-birimizdi baqylap júrgenshe basqa bir mehanızmdi oılap tabý qajet", - dep atap kórsetti Úkimet basshysy.
