Baqylaý arkalar sany 80-ge jetip, baqylaýdy 30 paıyz ǵana qamtıtyn barlyq beketter jabylady
ASTANA. 9 sáýir. QazAqparat - Qazaqstanda Baqylaý arkalarynyń sany 80-ge jetkizilip, qazirgi kúni júk avtokólikteriniń aǵynyn baqylaýdy 30 paıyz ǵana qamtyp otyrǵan barlyq statsıonarlyq beketter jabylatyn bolady. Bul týraly Aqtaý qalasynda Aqtóbe, Atyraý, Batys Qazaqstan jáne Mańǵystaý oblystarynyń basshylyǵy men qoǵamdyq uıymdary ókilderine Kólik ınfraqurylymdaryn damytý jónindegi memlekettik baǵdarlama jobasyn tanystyrý barysynda QR Kólik jáne kommýnıkatsııa vıtse-mınıstri Qaırat Ábsattarov málim etti.
Qoǵamdyq tyńdaý talqysyna usynylǵan qujat Memleket basshysynyń «Qazaqstan-2050» Strategııasy: qalyptasqan memlekettiń jańa saıası baǵyty» atty Qazaqstan halqyna arnaǵan Joldaýynda berilgen tapsyrmasy boıynsha ázirlenýde. Qujattyń basty maqsaty Qazaqstannyń ekonomıkalyq ósý múmkindikterin keńeıtýdi qamtamasyz etetin jáne turǵyndardyń kólik qyzmetine degen suranysyn qanaǵattandyratyn jańa kóliktik ınfraqurylymdy qalyptastyrý bolyp tabylady. Qujat Qazaqstannyń kólik júıesiniń básekege qabilettiligin, elimizdiń tranzıttik áleýetin 2020 jylǵa qaraı 2 esege, al 2050 jylǵa qaraı 10 esege arttyrýǵa, jańa jumys oryndaryn ashýǵa, sonymen birge kólikte qyzmet kórsetý sapasy men qaýipsizdikti arttyrýǵa baǵyttalǵan.
Budan bólek, tasymaldyń barlyq túrleri boıynsha kólik úderisin avtomattandyrý kózdelýde, osynyń arqasynda rásimdeý qajet qujattar sany azaıyp, júkti jetkizý ýaqyty qysqarady, kólik aǵynyn basqarý qyzmetiniń sapasy men joldardaǵy qaýipsizdik 25-35 paıyzǵa artyp, jol-kólik oqıǵasy saldarynan oryn alatyn adam ólimi azaıady, kóliktik baqylaýdyń tıimdiligi artady.
Salmaq ólsheýdiń avtomattandyrylǵan júıesin iske qosý nátıjesinde sybaılas jemqorlyq kórinisteri joıylady, sebebi kóliktik baqylaý qyzmetkerlerimen júrgizýshilerdiń tikeleı ózara júzdesýi bolmaıdy. Júk kóliginiń salmaq parametrleri avtomatty túrde anyqtalady. Onyń salmaǵy ruqsat etilgen mólsherden artyq bolǵan jaǵdaıda avtokólik ıesine aıyppul salynady. Bul júıe júk jetkizý ýaqytyn qysqartyp qana qoımaıdy (ortasha júrý jyldamdyq saǵatyna 17 shaqyrymnan 60-70 shaqyrymǵa deıin artady). Sonymen birge tasymaldyń ózindik qunyn azaıtyp, joldardyń sapasyn saqtaýǵa múmkindik beredi. Búgingi kúni salmaq ólsheýdiń avtomattandyrylǵan 3 júıesi testik tártipte jumys istep tur. Jyl sońyna deıin 10, al 2014 jyly - 18 baqylaý arkalaryn ornatý josparlanýda. Jalpy, baqylaý arkalarynyń sany 80-ge jetkizilip, qazirgi kúni júk avtokólikteriniń aǵynyn baqylaýdy 30 paıyz ǵana qamtyp otyrǵan barlyq statsıonarlyq beketter jabylatyn bolady.
