Bakýden Aqtaýǵa baǵyt alǵan ushaqtan aqaý shyqty

ASTANA. KAZINFORM — Ázerbaıjan astanasy Bakýge kelgen ushaqtan aqaý bary anyqtaldy. Áýe bortynda jolaýshylar bolmaǵan. Bul aqparatty Kólik mınıstrliginiń baspasóz qyzmeti rastady.

— Aqtaý qalasy áýejaıynyń áýeaılaq jáne jerústi qyzmetteri áýe kemesin ushý-qoný jolaǵynan súıretý (súıemeldep shyǵarý) jumysyn atqardy. Ushaqtyń qonýy shtattyq rejımde boldy, qonǵannan keıin áýe kemesinde aqaý bary anyqtaldy, — delingen habarlamada.

Ushaq Bakýden Aqtaýǵa baǵyt alǵan jáne bortta jolaýshylar bolmaǵan. 

— Qazir áýejaı ashyq, shtattyq rejımde jumys isteıdi, — deıdi vedomstvodan.

Eske salaıyq, 25 jeltoqsanda Aqtaý mańynda Azerbaijan Airlines ushaǵy apatqa ushyrady. 

Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza tapty. Ókinishke qaraı, mert bolǵan jandardyń arasynda 6 Qazaqstan azamaty bar. 

Aqtaý mańynda bolǵan ushaq apatyna qatysty halyqaralyq áýe kóligi assotsıatsııasynyń (IATA) bas dırektory Vıllı Ýolsh málimdeme jasady. Ol áýe apatynyń sebebin anyqtaýdyń muqııat, ashyq ári beıtarap bolýy kerektigin aıtty.