Bakýdegi Prımore býlvarynda qazaqtyń kıiz úıi tigildi

BAKÝ. QazAqparat – Baký qalasynyń Prımore býlvarynda (Dəniz Vağzalı mańy, Reyhan meıramhanasyna qarama-qarsy) Qazaqstan men Ázerbaıjan arasyndaǵy dıplomatııalyq qarym-qatynastardyń ornatylǵanyna 30 jyl tolýyn merekeleý aıasynda qazaqtyń kıiz úıi tigildi, dep habarlaıdy QazAqparat tilshisi.

Belgili bolǵandaı, 2022 jylǵy tamyzdyń 6-31 aralyǵynda kıiz úıde «Welcome to KZ» aqparattyq-týrıstik ortalyǵy ashylyp, onda eki kórme ótkizý josparlanýda.

Onyń biri – turaqty kórmede Qazaqstannyń jarqyn jerleri týraly stendter, Shymbulaq taý shańǵysy kýrorty (Almaty), Baıqońyr ǵaryshaılaǵy, «Qyran» suńqar ortalyǵy (tiri suńqarmen jáne vırtýaldy shyndyq álemindegi suńqarmen ań aýlaý), «Esentai Mall» saýda oıyn-saýyq ortalyǵy (Almaty q.), «Air Astana» týrıstik baǵyttary usynylsa, apta saıynǵy ózgerister bolatyn kórmede Almaty jáne Shymkent qalalary, Almaty, Túrkistan jáne Mańǵystaý oblystary ózderiniń týrıstik áleýetin kórsetip, mádenı, kontserttik jáne oıyn-saýyq baǵdarlamalaryn ótkizedi.

Kórmege kelýshiler qazaqtyń salt-dástúrimen tanysyp, beınerolıkter tamashalap, áýen tyńdap, Uly Dala eliniń ulttyq taǵamdarynan dám tatyp, ejelgi kóshpendiler álemine enip, kádesyılar alýǵa múmkindik alady.

Іs-sharalar Qazaqstan elshiligi, «Discover Almaty» týrıstik kompanııasy, «Eır Astana» áýe kompanııasy jáne Qazaqstannyń Ázerbaıjandaǵy Saýda úıiniń qoldaýymen ótkizilýde.