Bakýdegi din lıderleri sammıtine qazaqstandyq delegatsııa qatysýda

BAKÝ.QazAqparat – Ázerbaıjanda álemdik din lıderlerdiń II-shi Baký sammıti ótýde, dep habarlaıdy QazAqparat tilshisi.

Atalǵan sharaǵa Qazaqstan tarapynan arnaıy kelgen delegatsııa qatysýda.

«Búgingi tańda álem elderinde ótkizilip jatqan dinaralyq tatýlyq pen ózara kelisim bastamalary, elordamyzda bastaý alǵan Álemdik jáne dástúrli dinder lıderleri seziniń jalǵasy ispetti dep te aıtýǵa bolady. Qazaqstannyń bul baǵytta tájirıbesi kóp», - dedi jıynǵa qatysqan Qazaqstan musylmandar dinı basqarmasynyń tóraǵasy Serikbaı qajy Oraz.

Bas múftıdiń pikirinshe, dinniń atyn jamylyp, túrli teris maqsattardy júzege asyrýshylardan álem halqynyń kópshiligi zardap shegip otyr. Onyń naqty aıǵaǵy – Taıaý Shyǵys jáne álemniń basqa da jerlerinde bolyp jatqan qaqtyǵystar men soǵystar.

«Konferentsııada álemde bolyp jatqan sońǵy oqıǵalar, Taıaý Shyǵys elderi men Sırııadaǵy qaqtyǵys jáne onyń dinge qatystylyǵy jan-jaqty talqylanyp jatyr. Dindi jamylyp teris áreketterge barý jaǵdaılary basa aıtylýda. Biraq ári qaraı ne isteý kerek, ony qalaı tıisti sharalar qabyldaý kerek degenge saıatyn naqty sheshimder aıtylmaı jatyr», - dedi qazaqstan delegatsııasynyń múshesi Ábsattar qajy Derbisáli.