Bakýdegi arnaıy operatsııa barysynda terrorshylardyń kózi joıyldy

BAKÝ. QazAqparat - Ázerbaıjannyń memlekettik qaýipsizdik qyzmeti (MQK) 31 qańtarda júrgizgen arnaıy operatsııasy barysynda el aýmaǵynda jarylys uıymdastyrmaqshy bolǵan terrorshylar tobynyń tórt múshesiniń kózi joıyldy, dep habarlaıdy «QazAqparat» HAA-nyń Bakýdegi tilshisi.

MQK-ǵa kelip túsken aqparatty tekserý barysynda anyqtalǵandaı, sheteldegi terrorıstik uıymǵa qarasty adamdar toby jarylǵysh zattar men qarýlar alyp, respýblıka aýmaǵynda lańkestik áreket jasamaqshy bolǵan.

Dinı ekstremızmge qatysty aýyr qylmys jasaǵan Ázerbaıjan azamattary - «Abý Havsa» laqap atyn ıemdengen M.Ýlýbekov, «Abdýlgarıb» esimindegi G.Demırov, «Abdýlhalıd» laqap atyn alǵan F.Sadygov, T.Almamedov, «Abdýllah» atyn jamylǵan S.Mamedov sekildi kúdiktilerdi tutqyndaý boıynsha operatsııa júrgizildi.

Operatsııa barysynda M.Ýlýbekov, G.Demırov, T.Almamedov jáne S.Mamedov qarsy oq atqan. Olardyń kózi joıyldy. F.Sadygov kúdikti retinde ustaldy. Jedel-tergeý is-sharalary jalǵasýda.