Bakýdegi ADEX-2026 kórmesinde 29 eldiń qorǵanys tehnologııalary usynyldy
ASTANA. KAZINFORM — Bakýde búgin ADEX-2026 6-shy Ázerbaıjan halyqaralyq qorǵanys kórmesi men Securex Caspian 15-shi halyqaralyq ishki qaýipsizdik, qorǵaý jáne qutqarý jabdyqtary kórmesi ashyldy, dep habarlaıdy Kazinform agenttiginiń menshikti tilshisi.
Kórmeler Ázerbaıjan Qorǵanys ónerkásibi mınıstrligi men Caspian Event Organisers uıymdasqan qoldaýymen 30 qyrkúıekten 2 qazanǵa deıin ótedi.
Bıylǵy ADEX kórmesine burynǵy jylǵydan kóp qatysýshy keldi. Atap aıtqanda 29 elden 270-ten astam kompanııa, 14 ulttyq pavılon jáne 33 elden 45 tirkelgen sheteldik delegatsııa qatysyp jatyr.
Qatysýshylar arasynda Túrkııa, AQSh jáne Eýropanyń jetekshi qorǵanys ónerkásibi salasyndaǵy kompanııalary bar. Túrkııadan Roketsan, Aselsan, Baykar, Turkish Aerospace Industries jáne Havelsan kompanııalary kelgen. Al AQSh-tyń Northrop Grumman, SIG SAUER jáne Lockheed Martin, Germanııanyń Rheinmetall jáne Rohde & Schwarz, sondaı-aq Ulybrıtanııanyń BAE Systems kompanııalary osy kórmege alǵash ret kelip otyr.
Kórmede ushqyshsyz júıeler, ushaqtar, brondalǵan kólikter, áskerı-teńiz júıeleri, qarý-jaraq pen oq-dáriler, elektrondyq jáne optoelektrondyq júıeler, baılanys jabdyqtary jáne basqa da qorǵanys tehnologııalary bar. Atap aıtqanda, Túrkııanyń ókilderi PAMİR 4×4, KİRPİ II 4×4 ı VURAN 4×4 áskerı kólikterin kórsetip jatyr.
Securex Caspian kórmesinde quqyq qorǵaý jáne shekara organdaryna, qutqarý jáne arnaıy qyzmetterge, sondaı-aq beınebaqylaý júıelerine, aqparattyq jáne kıberqaýipsizdikke, órt qaýipsizdigine arnalǵan sheshimder usynylady.
Kórme aıasynda, sondaı-aq qorǵanys tehnologııalary, jasandy ıntellekt, kıberqaýipsizdik, elektrondyq soǵys jáne basqa da salalar boıynsha taqyryptyq sessııalar ótedi. Ázerbaıjan memlekettik organdarynyń ókilderi, sheteldik delegatsııalar jáne qatysýshy kompanııalar arasyndaǵy ekijaqty kezdesýler de josparlanǵan.
Qazaqstan men Ázerbaıjan Kaspıı arqyly jolaýshylar tasymalyn qaıta iske qospaq.
