Bakýde Túrki yntymaqtastyǵy uıymdarynyń keńesi ótti

ASTANA. QazAqparat - 8 aqpanda Bakýdegi TúrkPA keńsesinde Túrki keńesi, Túrki akademııasy halyqaralyq uıymy, TÚRKSOI jáne Túrki mádenıeti men murasy qorynyń tórtinshi úılestirý keńesi ótti, dep habarlaıdy QazAqparat twesco.org saıtyna silteme jasap.

TúrkPa Bas hatshysy Altynbek Mamaıýsýpov tóraǵalyq etken keleli kezdesýge Túrki keńesiniń Bas hatshysy Ramıl Gasanov, TÚRKSOI uıymynyń Bas hatshysy Dúısen Qaseıinov, Túrki mádenıeti jáne murasy qorynyń prezıdenti Gıýnaı Efendıeva, Túrki akademııasynyń turaqty hatshysy Ashat Kesikbaev pen sarapshy mamandar qatysty.
 

Túrki yntymaqtastyǵy uıymdarynyń ókilderi 2017 jyly atqarǵan qyzmetteri týraly, sondaı-aq 2018 jylǵa josparlanǵan jobalary jóninde málimetter usyndy. Sonymen birge, hatshylyqtar arasynda úılestirý jumystaryn jáne aqparat almasýdy jetildirý týraly ortaq kelisimge keldi.

Taraptar sondaı-aq, TÚRKSOI-dyń 25 jyldyǵy, TúrkPA-nyń 10 jyldyǵy, ÁDR-diń 100 jyldyǵyna jáne Túrki álemine ortaq tanymal qazaq aqyny Maǵjan Jumabaevtyń 125 jyldyǵy men kórnekti qyrǵyz jazýshysy Shyńǵys Aıtmatovtyń 90 jyldyǵyna oraı birqatar mańyzdy is-sharalardy birlesip uıymdastyrýǵa kelisti.
 

Jıyn sońynda qatysýshylar kelesi V úılestirý keńesin 2018 jyly Ázerbaıjanda Túrki Mádenıeti men murasy qory ótkizetini týraly sheshim qabyldady.