Bakýde Túrki mádenıeti men murasy qory keńesiniń birinshi otyrysy ótti
BAKÝ. KAZINFORM – Kezdesýde qorǵa qatysýshy elderdiń mádenıet mınıstrlikteriniń basshylary bas qosty.
Túrki mádenıeti men murasy qory 2015 jyly Ázerbaıjan basshysy Ilham Álıevtiń bastamasymen quryldy jáne ony Qazaqstan, Qyrǵyzstan jáne Túrkııa memleketteriniń basshylary qoldady.
Qor qurýdaǵy negizgi maqsat – túrki mádenıeti men murasyn saqtaýǵa, zerdeleýge jáne nasıhattaýǵa arnalǵan baǵdarlamalar men jobalardy qoldaý jáne qarjylandyrý.
Ázirbaıjan Mádenıet mınıstri Ádil Kerımlı qor aldynda Túrki álemi úshin ózekti jahandyq jáne óńirlik jaǵdaıǵa saı jańa baǵyttardy damytýda aýqymdy mindetter turǵanyn atap ótti.
Túrki mádenıeti jáne murasy qorynyń prezıdenti Aqtoty Raıymqulova qor nátıjelerimen bólisip, aldaǵy jańa baǵyttar men 2024-2025 jyldarǵa arnalǵan jumys josparymen tanystyrdy.
Jalpy, qordyń jumys josparyn barlyq qatysýshy elder qoldady. Atalǵan jospardy júzege asyrý uıym qyzmetine jańa serpin bereri sózsiz.
Qazaqstannyń mádenıet jáne aqparat mınıstri Aıda Balaeva óz sózinde Túrki mádenıeti men murasy qory túrki memleketteriniń halyqaralyq arenadaǵy birliginiń úlgisi ekenin atap ótti.
«Qor bizdiń mádenıetimizdi de, elimizdi de bir-birimen odan ári jaqyndastyra túsedi. Mádenı jáne ǵylymı is-sharalar, onyń ishinde Qordyń uıymdastyrýymen ótetin kórmeler baılanysymyzdy nyǵaıtady jáne tyǵyz yntymaqtastyqqa múmkindik týǵyzady», - dedi Aıda Balaeva.
Mınıstr otyrysqa qatysýshylardy Tańbaly petroglıfterine arnalǵan ǵylymı-praktıkalyq konferentsııaǵa shaqyrdy.
Bıyl Qazaqstanda ótetin konferentsııaǵa túrki áleminiń ǵalymdary jınalady.
Mınıstr Túrki memleketteri uıymy, Halyqaralyq Túrki mádenıeti uıymy, Halyqaralyq Túrki akademııasynyń jáne Halyqaralyq Túrki mádenıeti men murasy qorynyń túrki murasyn saqtaýǵa jáne nasıhattaýǵa baǵyttalǵan qyzmetteriniń naqty fýnktsııalaryn birge atqarý jáne aıqyndaý úshin josparlardy taldaý kerektigin atap ótti.
Osyǵan baılanysty, onyń pikirinshe, eskertkishterge saraptama júrgizý, restavratsııa jasaý, sondaı-aq olardy ıÝNESKO tizimine engizý boıynsha biryńǵaı top qurǵan jón.
Sonymen qatar Aıda Balaeva VІ Dúnıejúzilik mádenıetaralyq dıalog boıynsha forýmǵa qatysty. Forým Ázerbaıjan basshysy Ilham Álıevtiń qatysýymen ótti. Atalmysh is-sharaǵa 110-nan astam elden júzdegen qatysýshy keldi.
Paneldik pikirtalastar men plenarlyq otyrystarda bilim, jastar, klımattyń ózgerýi, jasandy ıntellekt, mádenı murany qorǵaý, zańsyz kóshi-qon sııaqty taqyryptar talqylandy.