Bakýde «Túrki áleminiń dıalogy: ortaq bolashaq, ortaq kózqaras» forýmy ótedi
ASTANA. KAZINFORM – Búgin, 15 qyrkúıekte Ázerbaıjan astanasy Bakýde «Túrki áleminiń dıalogy: ortaq bolashaq, ortaq kózqaras» atty paneldik pikirtalas ótedi. Bul týraly Anadolý agenttigi jazdy.
Túrkııa Prezıdenti ákimshiliginiń kommýnıkatsııalar basqarmasy habarlaǵandaı, is-shara Túrki memleketteri uıymyna (TMU) múshe jáne baqylaýshy elderde ótip jatqan osy attas paneldik pikirtalastar serııasy aıasynda uıymdastyrylady. Bul kezdesýler 29–30 qazanda Ankarada ótetin TMU memleket basshylarynyń 13-sammıtine oraı ótkizilip otyr.
Pikirtalastar serııasynyń alǵashqy otyrysy Astanada ótken. Ekinshi kezdesý 15 qyrkúıekte Bakýde uıymdastyrylady.
Paneldik pikirtalasty Túrkııa Prezıdentiniń kommýnıkatsııalar jónindegi keńesshisi Mehmet ıÝdje júrgizedi. Túrkııa Prezıdenti ákimshiliginiń kommýnıkatsııalar basqarmasy basshysy Býrhanettın Dýran jıynǵa beınebaılanys arqyly qatysady.
Talqylaýǵa Túrkııa Prezıdentiniń bas keńesshisi ári Qaýipsizdik jáne syrtqy saıasat keńesiniń múshesi Seııt Sertchelık, Ázerbaıjan Ulttyq Májilisiniń depýtaty Farız Ismaılzade, Túrkııa Ultshyl qozǵalys partııasy (MHP) tóraǵasynyń bas keńesshisi Esma Ózdashly, Halyqaralyq qatynastardy taldaý ortalyǵynyń dırektory Farıd Shafıev jáne Kavkaz halyqaralyq qatynastar jáne strategııalyq zertteýler ortalyǵy dırektorynyń orynbasary Nazım Djaferov qatysady.
Іs-sharanyń negizgi maqsaty – Túrki memleketteri uıymynyń óńirlik jáne jahandyq deńgeıdegi tanymaldyǵyn arttyrý, túrki áleminiń ortaq kózqarasyn keń aýdıtorııaǵa jetkizý, sondaı-aq elder arasyndaǵy akademııalyq, mádenı, ekonomıkalyq jáne áleýmettik yntymaqtastyqty nyǵaıtý.
Pikirtalas barysynda bilim berý, ekonomıka, kólik, energetıka, ǵylym jáne tehnologııa, qorǵanys ónerkásibi, BAQ jáne mádenıet salalaryndaǵy qazirgi yntymaqtastyqty odan ári damytý joldary talqylanady. Sonymen qatar bolashaqtaǵy birlesken jobalar men ózara is-qımyl múmkindikteri qarastyrylady.
Kezdesýde qazan aıynda Ankarada ótetin TMU memleket basshylarynyń 13-sammıtine qatysty kútilimder de sóz bolady.
Eske sala keteıik, buǵan deıin TMU sammıti qarsańynda Astanada túrki áleminiń ortaq bolashaǵy talqylandy.
Sondaı-aq Túrki memleketteri uıymy (TMU) keńistigi úshin elder arasyndaǵy saıahatty jeńildetý jáne mádenı yntymaqtastyqty jandandyrý úshin jańa bastamalar ázirlenip jatqany habarlandy.
