Bakýde «Teńiz kýbogy-2017» jarysy aıaqtaldy

BAKÝ. QazAqparat - Búgin Ázerbaıjan astanasy Bakýde Halyqaralyq áskerı oıyndar aıasynda «2017-Teńiz kýbogy» jarysy aıaqtaldy. Bul týraly «QazAqparat» HAA Ázerbaıjandaǵy menshikti tilshisi habarlady.

«Tutastaı, shara tatý kórshilik, túsinistik aıasynda ótti. Bul jarys ózara is-qımylǵa, yntymaqtastyqqa, dostyqqa baǵyttaldy. 2015 jyly negizi qalanǵan bastama jalǵasady degen úmittemiz. Qatysýshylar ózara dostasyp ketti, turaqty aralasyp, óz múmkindikterin kórsetýde, qarsylastarynan oń tájirıbe almasýǵa tyrysýda. Bizdiń qabiletimiz erteń Kaspıı teńizine áskerdiń kelýin arttyrýǵa emes, ondaǵy qaýipsizdikti qamtamasyz etýge qyzmet etkenin qalaımyz.

Biz kúlli álemge Kaspıı - álem teńizi, dostyq teńizi ekenin kórsetýimiz qajet. Bizdiń Prezıdent, Qazaqstannyń Bas qolbasshysy óziniń syrtqy saıası qyzmetinde únemi kórshi eldermen, kaspıı mańyndaǵy memlekettermen ózara is-qımylymyzǵa basa nazar aýdarady. Bizdi Kaspıı teńizi bólmeıdi, kerisinshe, biriktiredi degimiz keledi», - dedi QR QK Áskerı teńiz kushteriniń Bas qolbasshysy Ermek Baıǵabylov.

Kontserttik baǵdarlama aıaqtalǵannan keıin Ázerbaıjan, Reseı, Iran, Qazaqstan komandalary qatysýshylaryn marapattaý rásimi ótti.

Jeńimpazdarǵa kýboktar men medaldardy Reseı men Ázerbaıjan qorǵanys vedomstvolary mınıstrleriniń orynbasarlary general-leıtenant A.Fomın men general-leıtenant K.Velıev, sondaı-aq Ázerbaıjan Respýblıkasy Áskerı teńiz kúshteriniń qolbasshysy, 1 rang kapıtany Z.Gýmmetov tabys etti. Reseı men Ázerbaıjan birdeı ball jınap baıqaýda jeńisti bólisti.

Sonymen, jarys nátıjesi boıynsha jeńimpazdar 246 ball jınady. Iran - 234, Qazaqstan - 227 ball jınady. Jarys Reseı qorǵanys vedomstvosynyń bastamasymen 2015 jyldan bastap úshinshi ret uıymdastyrylýda.

Jarysqa barlyǵy Qazaqstan, Reseı, Belarýs, Ázerbaıjan, Qytaı - 22 polıgonyndaǵy 30 elden 3,5 myńǵa jýyq adam qatysýda.