Bakýde «Soltústik-Ońtústik» temir jol dálizin ǵasyrdyń eń iri jobalarynyń biri sanaıdy
ASTANA. QazAqparat - Ázerbaıjan prezıdenti ákimshiliginiń syrtqy baılanys bóliminiń basshysy Novrýz Mamedov senbide «Soltústik-Ońtústik» kólik dálizi ǵasyrdyń eń iri jobalarynyń biri bolyp tabylatynyn málimdedi.
«Soltústik-Ońtústik» kólik dálizi Soltústik Eýropany Ońtústik Azııamen biriktirýdi kózdeıdi. Jobany iske asyrý barysynda Ázerbaıjan, Iran, Reseı temir joldary biriktiriledi. «Soltústik-Ońtústik» dálizi boıynsha birinshi kezeńde jyl saıyn 5 mıllıon tonna júk, odan ári 10 mıllıon tonnadan astam júk tasymaldaý josparlanýda. Budan buryn RTJ dáliz jobasyn damytýǵa qatysatynyn málimdegen bolatyn.
«Bul ǵasyrdyń iri jobalarynyń biri, Bakýde ótken úshjaqty sammıtte Ázerbaıjan, RF, Iran prezıdentteri rastaǵan. Joba óńirdiń damýyn, turaqtylyǵyn, qaýipsizdigin qamtamasyz etý jolynda mańyzdy qadam bolyp tabylady», - degen Mamedovtyń sózin keltiredi Trend agenttigi.
