Bakýde salmaǵy 18 myń tonnany quraıtyn ǵımarat ornynan jyljytylmaq
BAKÝ. 15 sáýir. QazAqparat - Ázerbaıjan astanasy Baký qalasynyń ortalyǵynda ornalasqan ǵımarat arnaıy qurylǵynyń kómegimen 10 metrge jyljytylatyn bolady.
Bul týraly búgin Bakýdegi ǵımaratty kóshirý boıynsha josparǵa arnalǵan baspasóz máslıhatynda Bresser Eurasia BV kompanııasynyń quryltaıshysy Leon Sveergers habarlady.
«Kelesi aptada Ázerbaıjanda ǵana emes, burynǵy KSRO elderiniń aýmaǵynda tuńǵysh ret Baký ortalyǵynda Fızýlı kóshesinde ornalasqan ǵımaratty jyljytpaqpyz. Bul ońaı mindet emes, óıtkeni ǵımarattyń qabyrǵalary aýyr , onyń salmaǵy 18 myń tonnaǵa jetedi. Bul ornynan jyljytylatyn álemdegi eń aýyr ǵımarat», - dedi L. Sveergers.
Onyń aıtýynsha, Baký qalasynyń bıligi ǵımaratty kóshirý týraly sheshimdi eki sebeppen qabyldady: joldardy keńeıtý jáne tarıhı-sáýlet eskertkishin saqtap qalý. Ǵımarat 10,6 metrge jyljytylatyn bolady.
Óz kezeginde kompanııanyń ortaq quryltaıshysy Herman Bresser Bresser Eurasia BV kompanııasy túrli ǵımarattardyń ornyn aýystyrýmen, negizinen Batys Eýropada 30 jylǵa jýyq ýaqyt aınalysyp kele jatqanyn atap ótti.
«Nysandy jyljytýǵa 18 sáýir kúni ázir bolamyz degen oıdamyn», - dep túıdi sózin H. Bresser.
