Bakýde Rahmadıevtiń «Alpamys» operasy kórermenderdiń zor yqylasyna ıe boldy

BAKÝ. 6 mamyr. QazAqparat - Jaqynda Bakýde Ázirbaıjan Memlekettik opera jáne balet teatry ónersúıer qaýymǵa úlken syı tartý etti - Qazaqstannyń jetekshi sazgerleriniń biri Erkeǵalı Rahmadıevtiń «Alpamys» qoıylymy qoıyldy.

Atalmysh shara «TÚRKSOI» jobasynyń aıasynda Ázirbaıjandaǵy QR Elshiliginiń qoldaýymen ótken bolatyn. Saltanatty is-sharany «TÚRKSOI» uıymynyń Bas hatshysy Dúısen Qaseınov ashyp, alǵysózin aıtty.

Opera Qaýken Kenjetaevtyń lıbrettosyna jazylǵan jáne qazaqtyń ulttyq eposynyń batyry - Alpamysqa arnalǵan. «Alpamys» operasy - qazaq halqynyń qaharmandyǵyn kórsetetin tereń mazmundy, kórkem jáne tarıhı shyndyqty qamtıtyn aýqymdy shyǵarma. Operanyń bas keıipkeri Alpamys - ult qorǵany, jaý shapqynshylyǵyna ushyraǵan eliniń kegin qaıtaryp, týǵan elin baqytqa keneltken has batyr. Onyń qalyńdyǵy Gúlbarshynnyń da obrazy keremet. Oǵan danalyq, sulýlyq, adaldyq degen qasıetter tán. Álbette shyǵarmanyń eń qyzyqty tarmaǵy qazaq halqynyń tarıhı ómiriniń sıpatyn beretindigi.

Qoıylymǵa ázirbaıjan operasynyń juldyzdary qatysty. Alpamystyń rólin Anton Fershtand oınap shyqty. Gúlbarshyndy - Ilaha Efendıeva, Jer-Anany - Sabına Vahabzade, Taımyq handy - Talıat Gýseınov, Qarakózdi - Inara Babaeva, Qaramandy - Farıd Alıev, Mystandy - Farıda Mamedova, Keıqýatty - Týral Agasıev tamasha somdady. Mýzykalyq jetekshi ári dırıjer - Eııýb Gýlıev. Qoıylym kórermenderdiń úlken yqylasy men qoshemetine bólendi.