Bakýde Prezıdent Toqaevtyń ekologııalyq bastamalary talqylandy
ASTANA. KAZINFORM — Ázerbaıjannyń jetekshi joǵary oqý orny — Ázerbaıjan dıplomatııalyq akademııasynda (ADA) Kaspıı teńiziniń taıazdanýy máselelerine arnalǵan «Kaspıı máselesi: sebepteri, saldarlary jáne sheshimderi» taqyrybynda dóńgelek ústel ótti, dep habarlaıdy SІM baspasóz qyzmeti.
Іs-shara 2026 jylǵy 22-24 sáýirde Astanada ótetin Óńirlik ekologııalyq sammıt qarsańynda Qazaqstannyń Bakýdaǵy elshiliginiń bastamasymen uıymdastyryldy. Dóńgelek ústelge akademııalyq orta, ǵylymı-zertteý ınstıtýttary, memlekettik organdar, dıplomatııalyq mıssııalar jáne halyqaralyq uıymdardyń ókilderi qatysty.
Іs-sharada Qazaqstannyń Ázerbaıjandaǵy elshisi Álim Baıel, Mıllı Májilis depýtaty, ADA ýnıversıtetiniń prorektory Farız Ismaılzade, Ekonomıkalyq yntymaqtastyq uıymynyń Taza energııa ortalyǵynyń atqarýshy dırektory Aısel ıAgýbova, QR SІM Erekshe tapsyrmalar jónindegi elshisi Zúlfııa Súleımenova, Ázerbaıjan Respýblıkasy SІM Klımattyq dıplomatııa departamentiniń dırektory Elchın Allahverdıev, Qazaq Kaspıı teńizi ǵylymı-zertteý ınstıtýtynyń basshysy Serik Ahmetov, Ázerbaıjan Ulttyq gıdrometeorologııalyq qyzmetiniń basshysy Nazım Mahmýdov, Ázerbaıjan Ulttyq ǵylym akademııasynyń ókilderi, sondaı-aq ekologııa, sý máseleleri jáne klımattyq dıplomatııa salasyndaǵy basqa da jetekshi sarapshylar sóz sóıledi.
Á. Baıel óz sózinde Qazaqstan Prezıdenti Qasym-Jomart Toqaevtyń ekologııa máselelerine aıryqsha mán beretinin atap ótti.
— 15 naýryzda Qazaqstanda jańa Konstıtýtsııany qabyldaý jóninde referendým ótedi. Ata zańnyń jańa jobasynda azamattardyń tabıǵatty saqtaý jáne onyń baılyqtaryna uqypty qaraý jónindegi mindetteri alǵash ret aıqyndalǵan. Al memleket adam ómiri men densaýlyǵyna qolaıly qorshaǵan ortany qorǵaýdy maqsat etedi, — dedi ol.
Sondaı-aq, elshi dóńgelek ústel qatysýshylaryn sáýir aıynda Astanada ótetin Óńirlik ekologııalyq sammıt týraly habardar etti. Dıplomat Qazaqstan kóshbasshysy Q. K. Toqaevtyń BUU júıesi aıasynda tolyqqandy sý uıymyn qurý jónindegi bastamasy týraly málimet berdi.
A.ıAgýbova Kaspıı teńiziniń taıazdaný sebepteri men onyń jaǵalaýdaǵy memleketter úshin saldarlaryna toqtalyp, bul máselege halyqaralyq qaýymdastyqtyń nazaryn aýdarý qajettigin atap ótti. Z.Súleımenova Kaspıı máselelerin talqylaý bastamasyna joǵary baǵa berip, búgingi kúni teńizdiń taıazdanýyn tek tsıkldik úderistermen baılanystyrýǵa bolmaıtynyn málimdedi. Onyń aıtýynsha, teńizdiń jaǵdaıyna jahandyq jylyný eleýli teris áser etip otyr. Sondaı-aq, Z. Súleımenova Qazaqstannyń tabıǵatty qorǵaý sharalaryndaǵy jetistikteri týraly aıtyp berdi.
E.Allahverdıev Kaspıı mańy elderin teńizdiń ekologııalyq máselelerin sheshý úshin kúsh-jigerdi biriktirýge shaqyryp, taıazdaný alǵash ret tek ekologııalyq emes, sonymen qatar ekonomıkalyq problemalarǵa da ákep otyrǵanyn atap ótti. S. Ahmetov qatysýshylarǵa Kaspıı teńiziniń onjyldyqtar boıynsha ekologııalyq jaǵdaıy týraly prezentatsııa usynyp, sý únemdeý tehnologııalaryn engizýdi qosa alǵanda, máseleniń yqtımal sheshimderin usyndy.
Jalpy, dóńgelek ústel barysynda óńirdegi ekologııalyq daǵdarystyń sebepteri talqylanyp, yqtımal sheshimder boıynsha pikir almasý ótti. Qatysýshylar qorshaǵan ortany qorǵaý máselelerin birlesip sheshý jolyndaǵy Qazaqstan men Ázerbaıjannyń is-qımyldaryna joǵary baǵa berdi.
Osydan buryn Bakýde Qazaqstan-Ázerbaıjan ǵylym jáne bilim ortalyǵy qyzmet etetinin jazǵan bolatynbyz.