Bakýde ótken ǵylymı-shyǵarmashylyq festıvalde qazaqstandyqtar úsh atalym boıynsha jeńimpaz atandy

ASTANA. 8 sáýir. QazAqparat - 2013 jylǵy 1 sáýirde Ázirbaıjan Respýblıkasynyń astanasy Baký qalasynda TMD-ǵa qatysýshy memleketterdiń «Ideıa bar!» atty II ǵylymı-shyǵarmashylyq festıvaliniń jeńimpazdaryn marapattaý saltanaty ótti. Oǵan Qazaqstan Respýblıkasynyń delegatsııasy qatysty.

Bul týraly QR Bilim jáne ǵylym mınıstrliginiń baspasóz qyzmetinen habarlandy.

Atalmysh Festıval Ázirbaıjan Respýblıkasy Jastar jáne sport mınıstrliginiń bastamasymen TMD-ǵa qatysýshy memleketterdiń 2020 jylǵa deıingi halyqaralyq jastar yntymaqtastyǵy strategııasyn iske asyrý jónindegi 2012-2013 jyldarǵa arnalǵan is-sharalar josparyna sáıkes ótkizildi.

Festıvaldiń negizgi maqsaty - stýdentterdiń shyǵarmashylyq múmkindikterin iske asyrý úshin jaǵdaı jasaý, jastardyń bos ýaqytyn tıimdi uıymdastyrý, TMD keńistiginde jastar saıasaty salasyndaǵy halyqaralyq baılanystarǵa qoldaý kórsetý.

Konkýrsqa qatysý úshin 8 atalym boıynsha 300 jumys usynyldy: «Aýyl», «Tehnologııa jáne progress», «Qorshaǵan orta jáne damý», «Turǵyn úı jáne jumyspen qamtý», «Salaýatty ómir salty», «Áleýmettik sala», «Bilim berý», «Basqalar».

Sonyń ishinde eń kóp suranym bizdiń elden tapsyryldy - jalpy sany 277 jumystyń ishinen 86-sy Qazaqstan Respýblıkasynan boldy.

Konkýrstyń nátıjeleri boıynsha 3 qatysýshy 1-shi orynǵa ıe boldy:

- «Tehnologııa jáne progress» atalymy boıynsha - Moldabekov Marǵulan, Q. Jubanov atyndaǵy Aqtóbe memlekettik ýnıversıteti;

- «Qorshaǵan orta jáne damý» atalymy boıynsha - Ishanǵalıeva Sáýle, ál-Farabı atyndaǵy QazUÝ;

- «Turǵyn úı jáne jumyspen qamtý» atalymy boıynsha-L.N. Gýmılev atyndaǵy EUÝ PhD 1 kýrsynyń doktoranty Salıeva Dınara.

M. Tynyshpaev atyndaǵy Qazaq kólik jáne kommýnıkatsııalar akademııasynyń stýdentteri Asyǵat Arhat pen Toraıǵyr Merhat «Qorshaǵan orta jáne damý» atalymy boıynsha 2-shi orynǵa ıe boldy.

Barlyq jeńimpazdar men júldegerler aqshalaı syılyqtar men dıplomdarmen marapattaldy.