Bakýde órt saldarynan 16 adam qaza tapty
BAKÝ. QazAqparat - Búgin Baký qalasyndaǵy Azadlyg dańǵylynda ornalasqan kópqabatty ǵımaratta úlken órt boldy. Qazirgi kezde qaza tapqandardyń sany 16 adamǵa jetti, sonyń ishinde úsh bala tútinnen tunshyǵyp ajal qushqan. Taǵy 63 adam zardap shekken.
Oqıǵa ornynda jedel járdemniń 30 brıgadasy jumys istep otyr. Órtti sóndirýge tikushaq jumyldyryldy. Órt kezinde ǵımarattyń aldynda turǵan 5-ten astam kólik zaqymdaldy. Tótenshe jaǵdaılar boıynsha mınıstrdiń orynbasary Etıbar Mırzoev jalyn 4 saǵatqa jýyq ýaqyt sóndirilgenin málimdedi. Qazirgi ýaqytta órt tolyq sóndirildi. Kýágerlerdiń aıtýynsha, ǵımarattyń plastık qaptamasy órtengen. Oqıǵa ornynda eldiń ishki ister mınıstri Ramıl Ýsýbov, bas prokýror Zakır Garalov, bas prokýrordyń orynbasary Rýstam Ýsýbov bar. Óz kezeginde Ázerbaıjan Prezıdenti Ilham Álıev memlekettik organdarǵa órttiń shyǵý sebepterin anyqtap, oǵan kináli azamattardy jazaǵa tartýdy buıyrdy. Bul týraly Ázerbaıjan prezıdentiniń qoǵamdyq-saıası máseleler boıynsha kómekshisi Álı Gasanov aıtty.
