Bakýde Muhtar Áýezovtiń «Abaı» romanynyń latyn qarpindegi jańa basylymy tanystyryldy

ASTANA. KAZINFORM – Bakýdegi Atatúrik ortalyǵynda Muhtar Áýezovtiń «Abaı» romanynyń («Abaı joly» romanynyń alǵashqy eki bólimi) ázerbaıjan tilindegi jańa basylymy tanystyryldy. 

Túrki Akademııasynyń bastamasymen jaryq kórgen roman-epopeıa uly oıshyl, aqyn Abaı Qunanbaıulynyń 180 jyldyq mereıtoıy aıasynda jaryq kórip otyr.

Tusaýkeser rásiminde Túrki Akademııasynyń prezıdenti, akademık Shahın Mustafaevtyń aıtýynsha, bul basylym kórkem týyndynyń túpnusqalyq rýhyn qaıtarý ǵana emes, Qazaqstan men Ázerbaıjan arasyndaǵy mádenı baılanystardy nyǵaıtýdyń aıqyn kórinisi.

Muhtar Áýezovtiń bul romany alǵash ret ázerbaıjan tilinde 1954 jyly Eıýp Abbasovtyń tárjimeleýimen, sol kezdegi kırıll qarpinde jaryq kórgen bolatyn. Alaıda bul nusqa orys tilinen aýdarylǵan edi. Sodan bergi 70 jyldan astam ýaqyt boıy áıgili shyǵarma ázerbaıjan oqyrmandaryna qaıtadan usynylǵan emes.

− Bul joly roman qazirgi ázerbaıjan ádebı tili normalaryna saı, latyn qarpimen ári qazaq tilindegi túpnusqasy boıynsha salystyryla tekserilip, alǵashqy basylymdaǵy qatelikter túzetilip, keńestik tsenzýra sebebimen qysqaryp ketken keı tustary tolyqtyrylyp basyldy. «Abaı» romanynyń mundaı formatta jaryq kórýi – ádebı oqıǵa ǵana emes. Bul – mádenı jadty jańǵyrtý, ortaq rýhanı muramyzǵa degen qurmet pen ony saqtaý jolyndaǵy naqty qadam. Túrki Akademııasy aldaǵy ýaqytta da túrki halyqtarynyń mádenı-rýhanı murasyn zerdeleý jáne nasıhattaý baǵytyndaǵy keshendi jumystardy jalǵastyra beredi, – dedi akademııa basshysy.

Tusaýkeserge Ázerbaıjan Mıllı Májilisiniń depýtattary, Qazaqstan Respýblıkasynyń Ázerbaıjandaǵy Tótenshe jáne Ókiletti Elshisi Álim Baıel, TÚRKPA Bas hatshysy Mehmet Súreııa Er, Túrki mádenıeti men murasy qorynyń apparat jetekshisi Fahrı Hadjıev, sondaı-aq ǵylymı jáne bilim berý mekemeleriniń ókilderi, ádebıet jáne mádenıet qaıratkerleri qatysty.

Buǵan deıin Ázerbaıjanda ótetin III TMD oıyndarynyń boıtumary tanystyrylǵan edi.