Bakýde qazaqtyń ult-azattyq kúresi jolynda qurban bolǵan kórnekti tulǵalaryna arnalǵan kitap jaryq kórdi
ALMATY. 18 shilde. QazAqparat - Bakýde Ázerbaıjan Respýblıkasy UǴA Folklor ınstıtýtynyń Halyqaralyq qatynastar bóliminiń meńgerýshisi,
fılologııa ǵylymdarynyń doktory Alı Shamıloǵlynyń «Túrki jurtynyń qurbandary. Qazaqstan» dep atalatyn kitaby jaryq kórdi. Belgili ǵalym bul eńbegin ult-azattyq kúresi jolynda qurban bolǵan qazaqtyń kórnekti tulǵalaryna arnaǵan. Týyndyǵa Shoqan Ýálıhanov, Kenesary Qasymuly, Álıhan Bókeıhanov, Ahmet Baıtursynov, Mustafa Shoqaı, Maǵjan Jumabaev, Mirjaqyp Dýlatuly, Názir Tórequlov, Sanjar Aspandııarov, Ospan batyr bastaǵan birqatar kórnekti tulǵalardyń ómirbaıany men shyǵarmashylyǵy arqaý bolǵan.
Jaqynda Qazaqstanǵa issaparmen kelip qaıtqan ol M.Áýezov atyndaǵy Ádebıet jáne óner ınstıtýtynda qonaqta bolyp, eki eldiń ádebıeti salasynda ortaq jumystar atqarýy týraly ýaǵdalasqan bolatyn. Sondaı-aq Almaty oblysynyń Talǵar qalasynda qýǵyn-súrgin qurbany bolǵan Aqysqa túrikteriniń baba aqyny Qasta Hasan týraly «Aqysqalyq Qasta Hasan» dep atalatyn kitabynyń tusaýkeserin ótkizgen edi. M.Áýezov atyndaǵy Ádebıet jáne óner ınstıtýtynyń qyzmetkeri Aqedil Toıshanulynyń aıtýynsha, tanystyrylym kezinde Aqysqa túrikteriniń aq patsha zamanynan bastaý alyp keńestik dáýirde stalındik qýǵyn-súrginge ulasqan zobalańnyń álem tarıhynda kezdesetin qyzyl qyrǵyn, sary súrginniń eleýlisi ekeni sóz bolǵan.
