Bakýde Qazaqstannyń Táýelsizdik kúni atalyp ótti
Qazaqstannyń Ázerbaıjandaǵy Elshiliginde Qazaqstan Respýblıkasynyń Táýelsizdik kúnine oraı kezdesý ótti. Bul týraly Kazinform agenttiginiń menshikti tilshisi habarlaıdy.
Іs-sharaǵa Ázerbaıjan Respýblıkasynyń memleket qaıratkerleri, resmı tulǵalary, Parlament depýtattary, shet memleketterdiń elshileri men halyqaralyq uıymdardyń ókilderi, belgili ǵylym, mádenıet jáne óner qaıratkerleri, jetekshi taldaý ortalyqtarynyń sarapshylary, BAQ ókilderi, Ázerbaıjanda turatyn qazaqstandyqtar qatysty.
Qazaqstannyń Ázerbaıjandaǵy Elshisi Álim Baıel óz sózinde Táýelsizdik kezeńindegi negizgi jetistikterge toqtaldy. Dıplomat Qazaqstannyń Ázerbaıjanmen saıası, ekonomıkalyq, kólik-logıstıkalyq, qorǵanys salalaryndaǵy tabysty yntymaqtastyǵyna erekshe nazar aýdardy.
Á. Baıeldiń aıtýynsha, qazirgi ýaqytta elderimiz Orta dálizdiń kólik-logıstıkalyq áleýetin damytý, Ázerbaıjan arqyly Qazaqstan munaıyn tasymaldaý, Kaspıı teńiziniń túbimen talshyqty-optıkalyq baılanys jelisin ótkizý sııaqty óńirlik mańyzy bar iri jobalardy iske asyrýda. Budan basqa, Ázerbaıjan arqyly Qazaqstannan Eýropaǵa elektr energııasyn eksporttaý múmkindigi talqylanýda.
Ázerbaıjan Syrtqy ister mınıstriniń orynbasary Samır Sharıfov Qazaqstandy Táýelsizdik kúnimen quttyqtap, 2023 jylǵy ekijaqty yntymaqtastyqtyń negizgi qorytyndylaryna toqtaldy. Ázerbaıjan Mádenıet mınıstriniń orynbasary Farıd Djafarov jaqynda Bakýde uıymdastyrylǵan Qazaqstannyń mádenıet kúnderiniń tabysty ótkenin atap ótti.
Sonymen qatar, jıynǵa qatysýshylar Halyqaralyq túrik mádenıeti jáne murasy qorynyń jańadan taǵaıyndalǵan Prezıdenti Aqtoty Raıymqulovany qyzmetke kirisýimen quttyqtap, burynǵy Prezıdent Gúnaı Efendıevaǵa atqarǵan jumysy úshin alǵystaryn bildirdi.
Іs-shara aıasynda Qazaqstanǵa arnalǵan taqyryptyq fotokórme uıymdastyryldy. Qonaqtarǵa qazaq ulttyq taǵamdary usynyldy.
Serikbol Qoshmaǵambetov
