Bakýde qazaqstandyqtar senbilik ótkizdi

BAKÝ. QazAqparat – QR Elshiligi Ázerbaıjandaǵy qazaqstandyqtar qaýymdastyǵymen birlesip, 1 mamyr - Qazaqstan halqynyń birligi kúni Bakýdegi Abaı kóshesinde senbilik ótkizdi, dep habarlaıdy QazAqparat menshikti tilshisi.

Tabıǵatty qorǵaý jáne qorshaǵan ortany saqtaý ekologııalyq aktsııasy ázerbaıjan halqynyń jalpyulttyq kóshbasshysy Geıdar Álıevtiń týǵan kúnine, sondaı-aq Qazaqstan men Ázerbaıjan arasyndaǵy dıplomatııalyq qatynastardyń ornaǵanyna 30 jyl tolýyna oraılastyryldy.

Senbilikke qatysýshylar Bakýdiń Bınagadın aýdany sharýashylyq mekemeleriniń qyzmetkerlerimen birge qoqysty sypyryp jınady. Arnaýly quraldarmen aǵash dińderin áktedi. Abaı kóshesinde tazalyq jumystaryn júrgizgender osyndaı aktsııany jyl saıyn ótkizýge kelisti.

Buǵan deıin Bakýde Qazaqstannyń áleýmettik kásipkerlikti damytý týraly zań úlgisi tanystyrylǵany habarlanǵan.