Bakýde qazaqstandyq kıno, teatr jáne shyǵarmashylyq jobalar tanystyryldy
ASTANA. KAZINFORM – Qazaqstan Bakýdegi mádenı festıvalde kıno, teatr jáne shyǵarmashylyq jobalardaǵy jetistikterin, sonyń ishinde kórkem fılmder, mýzykalyq dramalar jáne halyqaralyq deńgeıde tanymal oıyn jobalaryn tanystyrdy, dep habarlaıdy Kazinform menshikti tilshisi.
Bakýde Islam Yntymaqtastyǵy Uıymynyń (IYU) mádenıet jáne shyǵarmashylyq ındýstrııa salasyndaǵy negizgi is-sharalardyń biri – IYU-nyń «Baku Creative Week — 2025» aýqymdy halyqaralyq festıvali ótti. Forýmǵa 50 elden 300-den astam ókil men sarapshy qatysty, shamamen 5 myń adam keledi dep kútilip otyr. Qazaqstannyń Ázerbaıjandaǵy elshiligi elimizdiń qatysýyn uıymdastyrý jáne qoldaýǵa belsendi atsalysty.
Qazaqstandyq kıno kúnderi aıasynda tórt fılm kórsetildi – «Mereke» (rej. I. Kárim), «Dabyl» operatsııasy» (rej. R. Súleımenov), «Jabaıy» (rej. D. Ábilhanov) jáne «Meniń atym Qoja» (rej. A. Qarsaqbaev). Fılmderdiń kórsetilimi Nizami Cinema Center jáne PARK CINEMA alańdarynda ótip, kópshiliktiń úlken qyzyǵýshylyǵyna bólendi.
Ońtústik Qazaqstanda 1992 jylǵy oqıǵalarǵa arnalǵan «Dabyl» operatsııasy» fılmi kórermenderdiń erekshe nazaryn aýdardy. Ol tarıhı málimetteriniń dáldigi, dramalyq shıelenisi jáne akterlerdiń mánerli oryndaýy úshin joǵary baǵalandy. Kórsetilimderden keıin kórermender akter Baqyt Qajybaev pen stsenarııshi Tamerlan Almanovty qosa alǵanda qazaqstandyq delegatsııamen fılmderdiń kórkemdik jáne mádenı aspektilerin talqylaýǵa múmkindik aldy.
Ázerbaıjan memlekettik akademııalyq mýzykalyq teatrynda qoıýshy rejısser Ashat Maemırovtyń jetekshiligimen Astana qalasy ákimdiginiń jastar mýzykalyq teatry oryndaǵan Qanat Júnisovtiń «Ámire» mýzykalyq dramasynyń qoıylymy ótti. Bul qoıylym kórnekti qazaq ánshisi Ámire Qashaýbaevtyń Parıjdegi «EKSPO» Dúnıejúzilik kórmede óner kórsetýiniń 100 jyldyǵyna arnalǵan. Kórermender qoıylymdy mýzykanyń úılesimi, sahnalyq horeografııa jáne tereń dramalyq damýy úshin joǵary baǵalady. Akter Orazaly Igilik basty róldi somdady. G-HUB sammıti aıasynda ótken Turkic Game Jam 2025 fınalynda Almaty Creative Hub-ta ótken Almaty hakatony jeńimpazdarynyń jobalary tanystyryldy.
Murakami Kult jáne Teqesh komandalary ózderiniń oıyn ázirlemelerin halyqaralyq qazylar alqasy men 50-den astam elden kelgen sarapshylarǵa kórsetti, bul Almaty oıyn ındýstrııasynyń joǵary deńgeıde damyp jatqanyn rastady.
Women’s Creativity Forum qatysýshylardyń erekshe nazaryn aýdardy, onda qazaqstandyq áıel kásipkerler men dızaınerler tsıfrlandyrý, ınnovatsııalar, jastardy qoldaý jáne mádenı kásipkerlikti damytý máselelerin talqylady. Forým Qazaqstan, Bahreın, Ózbekstan jáne basqa da elderden qatysýshylardy jınap, shyǵarmashylyq salalardy damytýdaǵy áıelderdiń yqpalynyń artýyn atap ótti.
Baký festıvaliniń baǵdarlamasyna MYFORUM mádenı jáne shyǵarmashylyq ındýstrııalar forýmy, MYEXPO Creative Village kórmesi, Baku Cinema Breeze 2025 kınobaǵdarlamasy, Shyǵys sán kórmesi, G-HUB sammıti jáne basqa da mádenı is-sharalar kirdi.
Qazaqstandyq delegatsııa barlyq negizgi platformalarǵa belsendi qatysyp, paneldik talqylaýlarǵa úles qosty jáne eldiń kıno, teatr, sandyq tehnologııalar, oıyn dızaıny jáne shyǵarmashylyq salalardaǵy áleýetin kórsetti.
Buǵan deıin Azerbaijan Fashion Week-te qazaqstandyq toptama halyqaralyq podıýmnyń sánin keltirgenin jazǵan bolatynbyz. Halyqaralyq is-shara Uly Jibek joly taqyrybyna arnaldy.