Bakýde Qazaqstan Prezıdentiniń Joldaýy talqylandy
ASTANA. KAZINFORM — Qazaqstannyń Bakýdegi elshiliginde Prezıdent Qasym-Jomart Toqaevtyń Joldaýy men qazaq-ázerbaıjan yntymaqtastyǵyn damytýǵa arnalǵan dóńgelek ústel ótti, dep habarlaıdy Kazinform agenttiginiń aımaqtaǵy menshikti tilshisi.
Jıynǵa Qazaqstannyń Ázerbaıjandaǵy elshisi Álim Baıel, Ázerbaıjan Mıllı Májilisiniń depýtaty Azer Allahverdııanov, jetekshi saraptamalyq ortalyqtardyń ókilderi, saıasattanýshylar, sarapshylar men dıplomattar qatysty.
Qazaqstannyń Ázerbaıjandaǵy elshisi Álim Baıel ázerbaıjandyq sarapshylarǵa Prezıdent Qasym-Jomart Toqaevtyń «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýynyń negizgi baǵyttaryn tanystyrdy. Ol ınfraqurylymdy jańǵyrtý, «Halyqtyq qurylys» baǵdarlamasyn iske asyrý, eldiń kólik-logıstıkalyq áleýetin damytý jáne ekonomıkany jedel tsıfrlandyrý máselelerine toqtaldy. Sonymen qatar Qazaqstannyń Jasandy ıntellekt mınıstrligin alǵashqylardyń biri bolyp qurǵanyn aıtyp, elimizdiń IT salasyndaǵy jetistikterine nazar aýdardy.
Dıplomat Qasym-Jomart Toqaevtyń 2026 jylǵy qazanda ótken Azııadaǵy ózara is-qımyl jáne senim sharalary jónindegi keńestiń VII sammıtine qatysý úshin Bakýge jasaǵan saparynyń qorytyndylaryn da atap ótti.
Sapar aıasynda Qazaqstan men Ázerbaıjannyń birlesken kúsh-jigeriniń nátıjesinde Ázerbaıjannyń uıymǵa tóraǵalyq etý merzimin uzartý jáne Bas hatshy qyzmetine osy eldiń ókilin taǵaıyndaý týraly sheshim qabyldandy. Farhad Mamedov bul sheshimdi Ázerbaıjan dıplomatııasynyń Azııadaǵy belsendiligin arttyrýǵa serpin bergen qadam retinde baǵalady.
Elshi eki el arasyndaǵy birlesken aýqymdy jobalardyń mańyzyna nazar aýdaryp, Prezıdenttiń Bakýge sapary kezinde talshyqty-optıkalyq baılanys jelisi ashylǵanyn aıtty. Bul — Transkaspıı baǵyty boıynsha júzege asqan alǵashqy ınfraqurylymdyq joba. Álim Baıeldiń pikirinshe, aldaǵy ýaqytta osy bastamanyń jalǵasy retinde basqa da mańyzdy ınfraqurylymdyq jobalar júzege asady.
Budan bólek Bakýde eki eldiń memleket basshylary Transkaspıı halyqaralyq kólik baǵdary týraly úkimetaralyq kelisimge qol qoıdy. Atalǵan kelisim kólik dáliziniń mártebesin arttyra túsedi.
Sarapshylar da Prezıdent Qasym-Jomart Toqaevtyń Joldaýyna joǵary baǵa berdi. Olardyń aıtýynsha, ekijaqty saıası dıalogtyń qarqyndy damýy yntymaqtastyqtyń barlyq baǵytyn jandandyryp, energetıka men kólik salalaryndaǵy ortaq strategııalyq jobalardy júzege asyrýǵa tyń serpin berip otyr.
Ázerbaıjan Mıllı Májilisiniń depýtaty Azer Allahverdııanov eki eldiń úkimettik emes uıymdary arasyndaǵy baılanysty nyǵaıtýdy usyndy. Bul bastamany parlamentaralyq yntymaqtastyq aıasynda júzege asyrýǵa nıetti ekenin de aıtty. Al BIZ CLUB zııatkerlik platformasynyń negizin qalaýshy Mýrad Sadaddınov Qazaqstandaǵy joǵary bilim berý júıesiniń damý deńgeıin joǵary baǵalady.
— Qazaqstan halyqaralyq joǵary oqý oryndarynyń fılıaldaryn ashyp, bilim berý salasyndaǵy áleýetin aıtarlyqtaı kúsheıtip keledi. Munyń nátıjesinde sońǵy jyldary Qazaqstannyń joǵary oqý oryndarynda bilim alyp júrgen ázerbaıjandyq stýdentterdiń sany birneshe ese ósti, — dedi sarapshy.
CASPIA taldaý ortalyǵynyń dırektory Orhan Iolchýev kólik-logıstıka salasyndaǵy yntymaqtastyqty nyǵaıtyp, bıýrokratııalyq rásimderdi jeńildetýdiń mańyzyn atap ótti. Al «Naqty balama» partııasynyń tóraǵasy Natıg Djafarlı IT jáne jasandy ıntellekt salalaryn damytýdyń ózektiligine toqtaldy. Sonymen qatar belgili ekonomıst dástúrli ekonomıka salalaryndaǵy baılanysty keńeıtýge, ónerkásiptik kooperatsııany damytýǵa, sonyń ishinde munaı ónimderin birlesip óndirýge nazar aýdardy.
Jıyn barysynda energetıka jáne kólik-logıstıka salalaryndaǵy yntymaqtastyq, ǵylymı-saraptamalyq baılanys, mádenı-gýmanıtarlyq qarym-qatynas máseleleri boıynsha sarapshylardyń pikirleri tyńdaldy.
Talqylaý barysynda qatysýshylar Túrki memleketteri uıymynyń mańyzy artyp kele jatqanyn atap, onyń bolashaǵy týraly pikir almasty. Sondaı-aq sarapshylar Ázerbaıjannyń Ortalyq Azııadaǵy yntymaqtastyq formatyna qatysýyna jan-jaqty qoldaý kórsetkeni úshin Qazaqstanǵa alǵys aıtty.
Buǵan deıin ózbekstandyq saıasattanýshy Joldaýdyń Qazaqstan damýynyń uzaq merzimdi baǵdaryn aıqyndaıtynyn aıtqan edi.
