Bakýde Qazaqstan Elshisi QR Konstıtýtsııasy kúnine oraı brıfıng ótkizdi

KÝ. 26 tamyz. QazAqparat /Arnur Muhametkárim/ - Búgin «Trend» aqparat agenttiginiń baspasóz ortalyǵynda Qazaqstannyń Ázirbaıjandaǵy Tótenshe jáne Ókiletti elshisi Serik Pirimbetov brıfıng ótkizdi.

«1995 jyly 30 tamyz kúni Qazaqstannyń jańa Konstıtýtsııasy qabyldandy, ol halyqtyń talqylaýyna tústi. Konstıtýtsııany qabyldaý úrdisi bir aıǵa jalǵasty, Konstıtýtsııa jobasyn talqylaýǵa halyq belsendi at salysty. Buǵan jobanyń ujymdyq talqylaýǵa túsken sany dálel bola alady,ıaǵnı negizgi zańymyzdyń jobasy 33 myńǵa jýyq ujymdyq talqylaýǵa túsken», - dep atap ótti Elshi.

Elshi sondaı-aq respýblıkamyzdyń ekonomıkalyq jetistikteri týraly sóz qozǵap, Qazaqstan basshysynyń syrtqy jáne ishki saıasat alańyndaǵy bastamalaryna erekshe toqtaldy.

Brıfıng sońynda S.Pirimbetov Qazaqstan men Ázirbaıjan arasyndaǵy ekijaqty qarym-qatynastyń damýy týraly aıtyp, bolashaqqa josparlanǵan mańyzdy is-sharalardy málim etti.