Bakýde Qazaqstan-Ázerbaıjan ǵylym jáne bilim ortalyǵy qyzmet etedi

ASTANA. KAZINFORM — Ekijaqty kún tártibinde mádenı-gýmanıtarlyq saladaǵy yqpaldastyq erekshe oryn alady. Bul týraly Memleket basshysy brıfıng kezinde aıtty.

Qasym-Jomart Toqaevtyń sózinshe, keıingi jyldarda eki elde alma-kezek ótken Qazaqstan men Ázerbaıjannyń Mádenıet kúnderi jáne Kıno kúnderi aıtýly oqıǵaǵa aınaldy.

— Bul baǵyttaǵy jumysty júıelendirý úshin Mádenı yntymaqtastyq baǵdarlamasyn qabyldaýǵa ýaǵdalastyq. Bilim men ǵylymdy, jastar baılanysyn damytýdyń perspektıvasy mol ekenine arnaıy toqtaldyq. Osy maqsatta Bakýde byltyrdan beri Qazaqstan-Ázerbaıjan ǵylym jáne bilim ortalyǵy qyzmet etedi, — dedi Memleket basshysy.

Sondaı-aq taraptar óńirlik jáne jahandyq kún tártibiniń ózekti máseleleri jóninde pikir almasqan.

— Biz halyqaralyq saıasattyń barlyq ózekti máseleleri boıynsha ustanymdarymyz uqsas ekenin atap óttik. Kópjaqty qurylymdar aıasyndaǵy jumysty úılestirýdiń mańyzyna mán berildi. Óńirlik jáne jahandyq deńgeıde beıbitshilik, qaýipsizdik pen turaqtylyqty nyǵaıtýǵa umtylatynymyzdy jetkizdik. Barshańyzǵa belgili, Prezıdent Ilham Geıdar oglý Álıev Prezıdent Tramptyń belsendi araaǵaıyndyǵymen Vashıngtonda Ázerbaıjan men Armenııa arasynda beıbit deklaratsııaǵa qol qoıyp, tarıhı mıssııasyn oryndady. Qazaqstan muny resmı túrde quptady. Qol jetkizilgen kelisimder Ońtústik Kavkazdaǵy senimdi nyǵaıtyp, jalpyǵa ortaq órkendeý úshin jańa múmkindikterge jol ashady dep oılaımyn. Jalpy, sapar qorytyndysy baýyrlas halyqtardyń ıgiligi úshin strategııalyq seriktestik pen odaqtastyq rýhyndaǵy qazaq-ázerbaıjan qarym-qatynastaryn odan ári damytýǵa qos tarap ta daıyn ekenin aıqyn kórsetedi, — dedi Qasym-Jomart Toqaev.

Osydan buryn Prezıdent byltyr Transkaspıı baǵdary arqyly júk tasymaldaý kólemi 62% ósip, 4,5 mln tonnany quraǵanyn aıtqan edi.