Bakýde qazaq kúresinen XII álem chempıonaty ótedi
ASTANA.KAZINFORM - 22-23 tamyz kúnderi Ázerbaıjan astanasy Bakýde qazaq kúresinen eresekter arasyndaǵy XII álem chempıonaty ótedi. Baıraqty báseke Baku Sports Palace sport kesheninde uıymdastyrylady.
Sport komıteti málimetinshe, álem chempıonatyna 30-ǵa jýyq elden 300-den astam sportshy qatysyp, eki kúnge josparlanǵan jarysta erler men áıelder arasynda barlyǵy 16 salmaq dárejesi boıynsha júldegerler anyqtalady.
Erler 55, 60, 66, 74, 82, 90, 100 jáne +100 kg, al áıelder 48, 52, 56, 60, 65, 70, 77 jáne +77 kg salmaq dárejelerinde beldesedi. Jarys baǵdarlamasyna sáıkes, ár kúni irikteý jáne jartylaı fınaldyq beldesýler, fınaldyq kezdesýler men jeńimpazdardy marapattaý rásimi ótedi.
Chempıonatty United World Wrestling halyqaralyq uıymynyń talaptaryna sáıkes Qazaq Kuresi qaýymdastyǵy men Ázerbaıjan Ulttyq sport túrleri qaýymdastyǵy birlesip uıymdastyrady.
Qazaqstan quramasynyń sapyna el chempıonattarynda, sondaı-aq respýblıkalyq jáne halyqaralyq jarystarda tájirıbe jınaqtaǵan úzdik balýandar endi. Ulttyq qurama Bakýdegi álem chempıonatynda el namysyn qorǵap, júldeli oryndar úshin baq synaıdy.
Qazaq kúresi – halqymyzdyń ǵasyrlar boıy qalyptasqan dástúrli sport túrleriniń biri. Búginde ulttyq kúres Qazaqstanda ǵana emes, halyqaralyq deńgeıde de qarqyndy damyp keledi. Qazaq kúresiniń sheteldegi geografııasy 40-tan astam memleketti qamtıdy.
Qazir qazaq kúresinen halyqaralyq jarystardyń turaqty júıesi qalyptasqan. Osy ýaqytqa deıin 11 álem chempıonaty, 13 Azııa chempıonaty, 6 álem kýbogy, 6 Eýropa chempıonaty jáne 2 Afrıka chempıonaty ótkizildi. Atalǵan jarystar Qazaqstanmen qatar Iran, Brazılııa, Ońtústik Afrıka Respýblıkasy jáne basqa da memleketterde uıymdastyryldy.
Bakýde ótetin XII álem chempıonaty qazaq kúresin halyqaralyq deńgeıde odan ári damytýǵa, ulttyq sporttyń bedelin arttyrýǵa jáne álem elderi arasyndaǵy sporttyq baılanysty nyǵaıtýǵa múmkindik beredi.
Aıta keteıik, Bekasyl Asambek erkin kúresten U20 álem chempıonatynyń jartylaı fınalyna shyqty.
