Bakýde qazaq kúresinen XII álem chempıonaty ótedi
ASTANA. KAZINFORM — 22-23 tamyz kúnderi Ázerbaıjan astanasy Bakýde qazaq kúresinen eresekter arasyndaǵy XII álem chempıonaty ótedi. Báseke Baku Sports Palace sport kesheninde uıymdastyrylady.
Týrızm jáne sport mınıstrliginiń habarlaýynsha, álem chempıonatyna 30-ǵa jýyq elden 300-den astam sportshy qatysyp, eki kúnge josparlanǵan jarysta erler men áıelder arasynda barlyǵy 16 salmaq dárejesi boıynsha júldegerler anyqtalady.
Erler 55, 60, 66, 74, 82, 90, 100 jáne +100 kg, al áıelder 48, 52, 56, 60, 65, 70, 77 jáne +77 kg salmaq dárejelerinde beldesedi. Jarys baǵdarlamasyna sáıkes, ár kúni irikteý jáne jartylaı fınaldyq beldesýler, fınaldyq kezdesýler men jeńimpazdardy marapattaý rásimi ótedi.
Chempıonatty United World Wrestling halyqaralyq uıymynyń talaptaryna sáıkes Qazaq Kuresi qaýymdastyǵy men Ázerbaıjan Ulttyq sport túrleri qaýymdastyǵy birlesip uıymdastyrady.
Qazaqstan quramasynyń sapyna el chempıonattarynda, sondaı-aq respýblıkalyq jáne halyqaralyq jarystarda tájirıbe jınaqtaǵan úzdik balýandar endi. Ulttyq qurama Bakýdegi álem chempıonatynda el namysyn qorǵap, júldeli oryndar úshin baq synaıdy.
Qazirgi tańda qazaq kúresinen halyqaralyq jarystardyń turaqty júıesi qalyptasqan. Osy ýaqytqa deıin 11 álem chempıonaty, 13 Azııa chempıonaty, 6 álem kýbogy, 6 Eýropa chempıonaty jáne 2 Afrıka chempıonaty ótkizildi. Atalǵan jarystar Qazaqstanmen qatar Iran, Brazılııa, Ońtústik Afrıka Respýblıkasy jáne basqa da memleketterde uıymdastyryldy.
Eske salaıyq, buǵan deıin Ǵabıt Rasýlhan dzıýdodan jasóspirimder arasynda álem chempıony atanǵanyn habarlaǵan edik.
