Bakýde qazaq kúresinen eresekter arasyndaǵy Eýropa chempıonaty bastaldy
BAKÝ. KAZINFORM — Ázerbaıjannyń Baký qalasynda qazaq kúresinen eresekter arasyndaǵy Eýropa chempıonaty ótip jatyr. Tól kúresimizden ótip jatqan dodaǵa kári qurlyqtyń 15-ke jýyq eliniń sportshylary baqtaryn synaýda.
Qazaq kúresi federatsııasy málim etkendeı, «Birikken Kúres álemi» (UWW) aıasynda ótip jatqan birinshilikte erler men áıelder beldesip, 16 salmaq dárejesiniń myqtylaryn anyqtaıdy.
Jarysty alǵysózben ashqan UWW Kongresi bıýrosynyń múshesi, dástúrli kúres túrleri komıtetiniń prezıdenti Rodıka Marııa ıAkshı Eýropa chempıonatynyń qazaq kúresin damytýdaǵy rólin atap ótip, jarys qatysýshylaryna sáttilik tiledi.
Saltanatty is-shara barysynda sóz alǵan Qazaq Kuresi Assotsıatsııasynyń bas dırektory Damır Bekbosynov atalmysh chempıonattyń mańyzdylyǵyna toqtalyp ótti.
«Qazaq kúresi Eýrazııa qurlyǵyndaǵy barlyq dástúrli kúres túriniń sınteziniń nátıjesi desek te bolady. Tól kúresimiz 1938 jyldan beri respýblıkalyq jarystardyń baǵdarlamasyna kiredi. Al 2016 jyly qazaq kúresi ıÝNESKO-nyń adamzattyń materıaldyq emes mádenı murasynyń reprezentatıvtik tizimine engizilgen. Búginge deıin qazaq kúresinen 10 álem chempıonaty, 12 Azııa chempıonaty, 6 álem kýbogy jáne 5 Eýropa chempıonaty ótti. Kezekti Eýropa chempıonatynyń Ázerbaıjan elinde ótip jatqanyna qýanyshtymyz. Chempıonatty joǵary deńgeıde uıymdastyrýǵa atsalysqan jergilikti qazaq kúresi federatsııasynyń basshylyǵy men ujymyna alǵysymdy bildiremin», - degen Damır Ásenǵazyuly balýandarǵa jeńis pen sáttilik tiledi.
Budan keıin Damır Bekbosynov UWW ókilderi men jergilikti federatsııanyń basshylyǵyna Qazaqstannan jetkizilgen arnaıy kádesyılardy, Ázerbaıjan Ulttyq sport assotsıatsııasynyń prezıdenti Kazym Kýrbanovqa Qazaq Kuresi Assotsıatsııasynyń prezıdenti ári QR Týrızm jáne sport mınıstrligi Sport jáne dene shynyqtyrý komıtetiniń tóraǵasy Erbol Myrzabosynovtyń Alǵys hatyn tabystady.
Eýropa chempıonatynyń demeýshisi – Sport Qory sportty qoldaý qory.
Eske salsaq, qazaq kúresinen sońǵy Eýropa chempıonaty Serbııanyń Zrenıanın qalasynda ótken bolatyn.
